Qazaqstanda dopıng qaǵıdalaryna ózgerister engizildi
ASTANA. KAZINFORM — Týrızm jáne sport mınıstriniń «Dopıngke qarsy qaǵıdalardy bekitý týraly» Qazaqstan Respýblıkasy 2014 jylǵy 19 qyrkúıektegi № 18 buıryǵyna ózgerister men tolyqtyrýlar engizildi.
Sporttaǵy dopıng qoldanýdyń aldyn alý maqsatynda Ulttyq dopıngke qarsy uıym jańartylǵan talaptardy usynady:
— dopıngtiń sportshyǵa jáne etıkalyq qundylyqtarǵa tıgizetin zııany;
— dopıng qoldanýdyń densaýlyqqa áseri;
— dopıngti baqylaý rásimi;
— dopıngke qarsy kúreste sportshylardyń quqyǵy men mindeti, onyń ishinde Dúnıejúzilik dopıngke qarsy kodeks jáne tıisti sport uıymdarynyń, dopıngke qarsy uıymdardyń saıasaty týraly, sondaı-aq dopıngke qarsy erejelerdi buzýdyń saldary týraly aqparat;
— tyıym salynǵan zattar men ádister tizimi, sondaı-aq terapııalyq maqsatta dopıngti qoldanýǵa ruqsat berý;
— taǵamdyq qospalar týraly aqparat.
— Dopıngke qarsy baqylaý júrgizý maqsatynda ulttyq nemese jergilikti akkredıttelgen sport federatsııalary sportshylardy testiden ótkizýdi uıymdastyrý men júrgizýge járdemdesýi tıis. Atalǵan tizim Ulttyq dopıngke qarsy uıym ulttyq nemese jergilikti akkredıttelgen sport federatsııalarynan alynǵan aqparat negizinde jınaqtalady, — delingen qujat jobasynda.
Jasaqtalǵan tizim Ulttyq dopıngke qarsy uıymnyń ınternet-resýrsynda ornalastyrylady jáne ulttyq akkredıttelgen sport federatsııalaryna joldanady.
Aıta ketetin jaıt, ulttyq nemese jergilikti akkredıttelgen sport federatsııalary Ulttyq dopıngke qarsy uıymnyń ınternet-resýrsynda tizim ornalastyrylǵan kúnnen bastap 5 kún ishinde sportshylarǵa olardyń bul tizimge engizilgeni jóninde habarlaýǵa mindetti.
Buıryq 2025 jylǵy 26 shildede kúshine enedi.
Eske salaıyq, elimizde dopıng qoldanǵan sportshynyń bapkeri de jaýapqa tartylady.
Eske sala ketsek, ótken jyly dopıng daýynan Olımpıada chempıony ataǵynan aıyrylǵan el sportshylary týraly jazǵan edik.