Qazaqstanda donorlyq músheni almastyrý boıynsha bir jyl ishinde 200-ge jýyq ota jasaldy
ASTANA. QazAqparat - Qazaqstanda ótken jyly donorlyq músheni aýystyrý boıynsha 200-ge jýyq ota jasalǵan.Bul týraly QR Densaýlyq saqtaý mınıstrliginiń bas transplantology Serik Jaryqov málim etti.
«Qazaqstanda búırek, baýyr syndy múshelerdi transplantatsııalaýda jańa tehnologııalardy qoldaný ıgerile bastady. Ótken jyly ǵana músheni almastyrý boıynsha 200-deı ota jasaldy. 5 jyl buryn mundaı operatsııalardyń sany áldeqaıda az bolǵan», - dedi QR Densaýlyq saqtaý mınıstrliginiń bas transplantology Serik Jaryqov.
Onyń aıtýynsha, Qazaqstanda adamnyń músheleri men ulpasyn zańsyz alýǵa jáne almastyrý otasyna tyıym salynǵan.
«Elde týystyq transplantatsııa qarqyndy damýda. Naýqastardy ólim aýzynan alyp qalýǵa kóbine týǵan-týystary kómektesedi. Alaıda kez kelgen adam naýqasqa donor bola almaıdy. Sebebi, olardyń fenotıpi sáıkes bolýy kerek. Eldegi transplantologtardy BAQ-da qazaqstandyqtar arasynda múshelerdi satý faktisiniń ulǵaıǵany týraly aqparattar alańdatady», - deıdi ol.
Jalpy, QR Halyq densaýlyǵy jáne densaýlyq saqtaý júıesi týraly Kodeksine sáıkes, adam músheleri men ulpalaryn satyp alý men satýǵa tyıym salynǵan.
«Tiri donordan nemese óli adamnyń múrdesinen músheler men ulpalardy alý tek memlekettik densaýlyq saqtaý mekemelerinde, memlekettiń qatysýymen jumys istep jatqan densaýlyq saqtaý mekemelerinde, sondaı-aq «transplantologııa» boıynsha qyzmet kórsete alatynyn rastaıtyn lıtsenzııasy bar densaýlyq saqtaý salasyndaǵy Ulttyq holdıng pen olardyń enshiles uıymdarynda júrgiziledi», - dep bas transpantolog.
Aıta keterligi, adamnyń músheleri men ulpalaryn jeke tulǵanyń ákelip berýine nemese shyǵarýyna jol berilmeıdi. Músheni zańsyz alý nemese kúshtep alý elimizdiń Qylmystyq kodeksimen qýdalanady. Al zańdy buzǵan azamat 10 jylǵa deıin bas bostandyǵynan aıyrylýy múmkin.
