Qazaqstanda donorlarǵa tólenetin aqshany 5 ese kóterý usynyldy

ASTANA. KAZINFORM — Senator Aqmaral Álnazarova óziniń depýtattyq saýalynda Qazaqstanda qan donorlaryn qoldaýdyń kemshilikterin aıtty. Osy oraıda ol Úkimet basshysy Álıhan Smaıylovtyń atyna depýtattyq saýal joldady.

Depýtattyń aıtýynsha, elimizde jyl saıyn 250 myńǵa jýyq adam donor bolady, onyń 47 paıyzy turaqty donor sanalady.

Donor bolǵan jan qan bergennen keıin, aǵzanyń energııa shyǵynynyń deńgeıin toltyrýy kerek.

Ol úshin donorlarǵa arnaıy tólem — 0,25 AEK (923 teńge) tólenedi.

Senatordyń paıymynşa, bul soma adam aǵzasyndaǵy mıkroelementter men kalorııaǵa degen qajet deńgeıdi qalpyna keltirý jáne anemııanyń aldyn alýǵa tym jetkiliksiz.

«Erikti donorlardyń densaýlyǵy tıisti túrdegi qoldaýdy qajet etedi. Usynystarǵa sáıkes, donor qan tapsyrǵan kúni anemııanyń aldyn alý úshin tıisti ratsıonda tamaqtanyp, joǵaltqan kılokalorııa men mıkroelementterdiń ornyn toltyrýy kerek. Qazirgi kezde qan donory qan bergen kezdegi kúsh-qýaty shyǵynynyń ótemaqysy retinde 0,25 AEK (923 teńge) alady. Bul másele 10 jyl boıy birneshe ret kóterilse de, oǵan nazar aýdarylmaı keledi. Osy rette, Úkimetten donorlarǵa ótemaqyny 0,25-ten 1,25 AEK-ke deıin (4615 teńge) tıisti túrde ulǵaıtý múmkindigin qarastyrýdy suraımyn. Qosymsha bıýdjet qarajaty — jylyna 848 mln teńge», — dedi Aqmaral Álnazarova.