Qazaqstanda dóńgelek aýystyrý qyzmetiniń quny qansha
ASTANA.KAZINFORM - Qazaqstan qalalarynda dóńgelek aýystyrý qyzmetiniń quny orta eseppen 8-9 myń teńge. Bul qyzmettiń quny dóńgelektiń dıametrine tikeleı baılanysty dep habarlaıdy Kazinform tilshisi.
Zań talaptary
Qazaqstannyń kóp óńirinde qys tústi. Qar, jel, kóktaıǵaq júrgizýshini ábigerge salary belgili. Sondyqtan polıtsııa qyzmetkerleri júrgizýshilerge aldyn ala qysqy dóńgelekke aýysatyn ýaqyt jetkenin aıtyp, eskertý jasady.
Aıtyp óteıik, jol qozǵalysy erejesine sáıkes jazǵy dóńgelekti qoldaný merzimi bar. Jeltoqsan, qańtar jáne aqpan aılarynda júrgizýshiler mindetti túrde qysqy dóńgelekpen júrýi tıis. Talapty saqtamaǵan júrgizýshige 5 AEK kóleminde aıyppul salynady. 2025 jyly bul – 19 660 teńge.
Aıtyp ótelik, dóńgelektiń de birneshe túri bar. Budyrly dóńgelek qystyń aıazynda, boran men kóktaıǵaqta jolda qaldyrmaıdy. Sonymen birge júrgizýshiler arasynda dóńgelektiń «jabysqaq» túri de suranysqa ıe. Bul qar jaýǵanda jáne qar erigende yńǵaıly. Qazir barlyq maýsymǵa arnalǵan túrin de qoldanýǵa bolady. Biraq ony qysy qatty óńirler qoldana almaıdy. Aıazdy jáne kóktaıǵaq kúni budyrly dóńgelekke teń kelmeıdi.
Baǵaǵa ne áser etedi?
Dóńgelek aýystyrý qyzmetiniń quny jylyna eki ret suranysqa ıe. Ol dóńgelekti jazdan qysqa, qystan jazǵa aýystyrý shaǵy. Bul ár aımaqta ártúrli ýaqyt ári bári de aýa raıyna baılanysty.
Erte qamdanatyndar az bolǵan soń alǵash qar jaýǵan kúni dóńgelek jóndeý ortalyqtarynda uzyn-sonar kezek túziledi. Baǵa dóńgelektiń dıametrine tikeleı baılanysty. Máselen, R13 dıametrli dóńgelegin aýystyrý arzanǵa túsedi. Baǵa ári qaraı kóterile beredi. Ereje boıynsha baǵa tórt dógelekke qatar esepteledi. Sonymen birge dóńgelektiń maıysqan jerin túzeý de qyzmet ishine kiredi. Bul joldaǵy qaýipsizdik pen dóńgelektiń jelinip qalmaýyna áser etedi. Keıde sheberhanalar bul qyzmetke qosymsha aqy alady. Mundaılar sırek te bolsa kezdesedi.
Qalalardaǵy baǵa
Dóńgelek jóndeý ortalyqtarynyń qyzmeti Aqtaýda arzan. Munda baǵa 4 000 teńgeden bastalady. Aıta ketken jón, qalada qar jaýǵan kúni birden dóńgelek aýystyrý kerek dep eshkim ábigerge túspeıdi. Sebebi qar sol kúni-aq erip ketýi múmkin.
Odan keıin Taraz ben Qyzylorda qalalary tur. Munda dóńgelek aýystyrý qyzmetiniń quny 5 000 teńgeden bastalady. Bul, árıne dıametri eń kishkentaıy.
Kóp qaladaǵy baǵa — 6000 teńge. Oral, Shymkent, Qaraǵandy, Jezqazǵan, Túrkistan men Taldyqorǵandaǵy baǵa osyndaı. Al jol talǵamaıtyn kólikterge orta eseppen 20 000 myń teńge suraıdy.
Petropavl, Almaty, Pavlodarda baǵa orta eseppen 7000 - 22 000 teńge aralyǵynda. Aıta keteıik, keıbir óńirde dóńgelek jóndeý oryndaryna aldyn ala jazylý kerek. Munyń jaqsy jaǵy da bar. Qar jaýǵan kezde birneshe saǵat boıy torýyldap turýdyń qajeti bolmaıdy.
Kókshetaý, Aqtóbe, Semeı men Óskemen qalalarynda qyzmet quny 7 500 teńgeden bastalady. Aqtóbe qalasynda dıametri eń úlken dóńgelekti aýystyrý quny ózge óńirlerge qaraǵanda tómen.
Bul qyzmet Astana qalasynda qymbat. Munda dóńgelek jóndeý ortalyqtary kem degende 8 000 teńge suraıdy. Sonymen birge Qostanaı qalasynda baǵa joǵary. Qyzmet quny 8 500 teńgeden bastalady.
Eske salsaq, buǵan deıin psıholog pen psıhıatr qyzmetiniń quny týraly jazyldy. Sonymen birge uıaly telefon men qysqa arnalǵan jyly aıaq kıim baǵasyn salystyrdyq.