Qazaqstanda domalaq aryzdar boıynsha tekserý faktileri joıyldy - Qarjy polıtsııasy
ASTANA. 17 qańtar. QazAqparat - Qazaqstanda domalaq aryzdar boıynsha tekserý faktileri joıyldy. QR Ekonomıkalyq qylmysqa jáne sybaılas jemqorlyqqa qarsy kúres agenttigi baspasóz qyzmetiniń habarlaýynsha, bul jaıynda vedomstvo basshysy Rashıd Túsipbekov málim etti.
«Jyl boıy biz shaǵyn jáne orta bıznes jumysyna aralaspaý uranymen jumys istedik. Osyǵan oraı úlken jumys atqaryldy. Atap aıtqanda, domalaq aryzdar boıynsha tekserý faktileri joıyldy. Qarjy polıtsııasy qyzmetkerlerine azamattyq-quqyqtyq qatynastarǵa aralasýdy boldyrmaý jáne qylmystyq jaýapkershilikke tartý úshin keltirilgen zalaly tómengi kórsetkishke jetpeıtin jalpy qylmystar boıynsha tekserýlerdi ótkizbeý tapsyryldy. Qoldanylǵan sharalar qarjy polıtsııasynyń bastamasymen ýákiletti organdardyń kásipkerlerdi tekserýin 5 esege azaıtýǵa múmkindik berdi. Osy jumysty ári qaraı jalǵastyrý qajet», - dedi ol.
Sonymen qatar vedomstvo basshysy Ulttyq kásipkerler palatasymen bıznes sýbektileriniń quqyǵyn qorǵaý boıynsha birlesken is-qımyl týraly jańa memorandýmnyń kelisý protsedýrasyn jyldamdatý jáne agenttikte kásipkerlerdi qabyldaý kúnin belgileý týraly tapsyrma berdi.
Kestege sáıkes agenttik tóraǵasynyń orynbasarlary men basqarma bastyqtary apta saıyn bıznes ókilderimen kezdesýi jáne olardyń suraqtaryna jaýap berýleri qajet.
