Qazaqstanda dızel otyny men kerosın taýar bırjalary arqyly saýdalanady
«Bıyl 17 mln tonna kóleminde munaı óńdep, 12,4 mln tonna munaı ónimderin óndirýdi josparlap otyrmyz. Otandyq munaı óńdeýdi qoldaý maqsatynda bıylǵy jyly ashyq tústi munaı ónimderine, ıaǵnı, benzın, dızel jáne áýe otynyna eksporttyq kedendik baj mólsherlemesi 3 ese tómendetildi. Qazirgi ýaqytta benzın men dızel otynyn eksporttaý kezinde aktsız tóleýden bosatýǵa qatysty sharalar qabyldanýda», - dedi óńdeý ónerkásibin damytý jaıynda baıandaǵan mınıstr.
Osy rette ol Prezıdent Joldaýynyń aıasynda munaı ónimderiniń salasynda da bırjalyq saýdany retke keltirý jáne jetildirý boıynsha tapsyrma berilgenin eske saldy.
«Bıylǵy naýryz aıynyń sońyna deıin benzın men bıtýmdy taýar bırjalary arqyly saýdalaýdy josparlap otyrmyz. Bul rette ótkizý kólemi «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» Qazaqstan Respýblıkasy Zańynyń aıasynda mınıstrlik bekitetin aı saıynǵy jetkizý josparlaryna sáıkes anyqtalatyn bolady. 2021 jylǵy 3-toqsanda dızel otyny men kerosındi taýar bırjalary arqyly saýdalaýdy bastaý josparlanýda», - dedi Nurlan Noǵaev.
