Qazaqstanda dızel otynynyń tapshylyǵy bola ma – mınıstrlik jaýap berdi

ASTANA. KAZINFORM – Qazaqstanda dızel otynynyń tapshylyǵyna negiz joq. Bul týraly Energetıka vıtse-mınıstri Sanjar Jarkeshov málim etti.

Búgin Úkimet otyrysynan keıingi baspasóz máslıhatynda tilshiler janar-jaǵarmaı baǵasyna qatysty suraq qoıdy.

«Sarapshylardyń aıtýynsha, qazir arzan dızel otynyn fermerler, kólik kompanııalary, kommýnaldyq qyzmetter aldyn ala jappaı satyp alý múmkin. Osynyń saldarynan naryqta otyn tapshylyǵy oryn alýy yqtımal. Mınıstrlik bul máseleni qalaı sheship jatyr?» - dep surady jýrnalıster.

- Jalpy, bul naryq yryqtandyryldy, ásirese benzın men dızel otynyna qatysty. Osy oraıda baǵa naryq arqyly retteledi. Jaqynda moratorıı engizilgenin bilesizder... Atap aıtqanda, ondaı jaǵdaı (tapshylyq) bolady dep oılamaımyz. Bizde otyn qory jetkilikti. Qazir naryqtaǵy suranys pen usynysty eskere otyryp, elimizdegi janarmaı naryǵynyń jaǵdaıy turaqty, - dedi S. Jarkeshov.

Onyń aıtýynsha, Qazaqstanda 400 myń tonnadan astam dızel otyny bar.

- Sondyqtan mundaı problema bolady dep oılamaımyz, - dedi vıtse-mınıstr.

Aıta keteıik, taıaýda Úkimet benzın men tarıf baǵasyna moratorıı engizilip, ıpoteka kólemin ulǵaıtý sheshimin jarııa etken bolatyn.

Osy oraıda bıylǵy 16 qazannan bastap ınflıatsııa deńgeıi turaqtanǵanǵa deıin AI-92 markaly benzın men dızel otyny baǵasyn odan ári kóterýge moratorıı engizildi. Premer-mınıstr Energetıka mınıstrligine Básekelestikti qorǵaý jáne damytý agenttigimen jáne óńir ákimdikterimen birlesip, tıisti qadaǵalaý júrgizýdi, sondaı-aq ishki naryqty JJM-men úzdiksiz qamtamasyz etý úshin qajetti sharalar qabyldaýdy tapsyrdy.

Eske salsaq, 2025 jyldyń qańtarynan Qazaqstanda janar-jaǵarmaı baǵasyn memlekettik retteý joıylyp, aqpan aıynan benzın, dızel otyny jáne avtogaz naryqtyq baǵamen satyla bastady. Naryqty yryqtandyrý baǵanyń ósýine ákeldi.