Qazaqstanda dıplomatııalyq jáne qyzmettik pasport berý tártibi ózgerdi
ASTANA. KAZINFORM – Memleket basshysy Qasym-Jomart Toqaev 2026 jylǵy 21 mamyrda dıplomatııalyq jáne qyzmettik pasporttardy rásimdeý, berý, aýystyrý jáne esepke alý tártibine ózgerister engizý týraly jarlyqqa qol qoıdy.
Qujatqa sáıkes, dıplomatııalyq jáne qyzmettik pasport berý qaǵıdalary jańartylyp, mundaı pasporttardy alýǵa quqyǵy bar laýazymdy tulǵalardyń tizimi bekitildi. Pasporttardy ýákiletti mınıstrlik Prezıdent bekitetin tizim negizinde beredi.
Sonymen qatar Syrtqy ister mınıstri Prezıdentpen kelisý arqyly negizgi tizimge enbegen azamattarǵa da dıplomatııalyq nemese qyzmettik pasport bere alady.
Dıplomatııalyq pasport alatyndar qataryna Prezıdent pen onyń otbasy músheleri, burynǵy prezıdentter, Parlament, Úkimet jáne Prezıdent ákimshiliginiń basshylyǵy, Memlekettik keńesshi, Konstıtýtsııalyq sot pen Joǵarǵy sottyń, Ulttyq banktiń, Ortalyq saılaý komıssııasynyń basshylary, Qaýipsizdik keńesiniń hatshysy, óńir ákimderi, Parlament depýtattary jáne ózge de joǵary laýazymdy tulǵalar engizilgen.
Budan bólek, dıplomatııalyq pasport dıplomatııalyq qyzmet ókilderine, halyqaralyq uıym qyzmetkerlerine, áskerı attashelerge, sheteldegi kúshtik qurylym ókilderine jáne olarmen birge shyǵatyn otbasy múshelerine beriledi. Sondaı-aq BUU-nyń bitimgerlik mıssııalaryna qatysýshylarǵa da dıplomatııalyq pasport rásimdeledi.
Qujatqa sáıkes, qyzmettik pasporttar Joǵarǵy sot sýdıalaryna, saıası jáne ákimshilik memlekettik qyzmetshilerge, quqyq qorǵaý jáne kúshtik organdar qyzmetkerlerine, dıplomatııalyq qyzmet ókilderine, sondaı-aq sheteldegi ókildikterge jiberiletin ulttyq kompanııa qyzmetkerlerine beriledi.
Sonymen qatar halyqaralyq mıssııalarǵa qatysatyn áskerı qyzmetshiler, birqatar memlekettik jáne kvazımemlekettik uıym qyzmetkerleri, sheteldegi Qazaqstan ókildikteriniń qyzmetkerleri men olardyń otbasy músheleri de qyzmettik pasport ala alady.
Jarlyqpen dıplomatııalyq jáne qyzmettik pasport rásimdeýge quqyǵy bar azamattar sanaty keńeıtildi. Olardyń qataryna halyqaralyq uıym qyzmetkerleri men sheteldik issaparǵa birge shyǵatyn otbasy músheleri de engizildi.
Qujat 2026 jylǵy 26 mamyrdan bastap kúshine enedi.
Aıta keteıik, buǵan deıin Qazaqstan pasporty álemdik reıtıngide joǵarylaǵany habarlanǵan bolatyn.
