Qazaqstanda dıplom saýdasy qyzyp tur – mınıstrlik ne deıdi

ASTANA. KAZINFORM – Jelide daıyn dıplomdy satyp alý múmkindigi týraly jarnalar qaptap júr. Osy oraıda Ǵylym jáne joǵary bilim mınıstrliginiń ustanymy qandaı? Bul saýalǵa vıtse-mınıstr Gúlzat Kóbenova jaýap berdi.

- Búginde dıplomdy satyp alýdyń qajeti joq, sebebi árbir dıplomdy eGov.kz arqyly tekserýge bolady. Dıplom ıesi nemese jumysqa qabyldaýshy dıplomnyń nómirin terse, sol jerde dıplomnyń qaı jerde, qashan berilgeni, qandaı joǵary oqý ornyn aıaqtaǵany týraly aqparat shyǵady. 1991 jyldan beri berilgen 3,5 mln-nan astam dıplom tsıfrlandyryldy, - dedi Gúlzat Kóbenova Úkimet úıinde ótken baspasóz máslıhatynda.

Vıtse-mınıstrdiń aıtýynsha, qazir ár dıplomda QR kody jáne serııalyq nómiri bar.

- Ókinishke qaraı, alaıaqtar bar, olar dıplom satýdy jarnamalap júr. Bul oraıda biz Іshki ister mınıstrligi, Mádenıet jáne aqparat mınıstrligi jáne Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip jumys istep jatyrmyz. Quqyqtyq jaýapkershilik baryn eskerý kerek, - deıdi ol.

Sondaı-aq mınıstrdiń orynbasary jalǵan dıplom ıeleri men ony satqandar jazalanatynyn aıtty.

- Árıne, jazalanady. Bul jerde ákimshilik jáne qylmystyq jaýapkershilik bar, - dep qorytyndylady G.Kóbenova.

Aıta keteıik, qazir joǵary, arnaýly oqý oryndaryn bitirgen túlekter qolyna dıplom alyp, jumys izdeýge kóshti. Biri qalada qalsa, endi biri eńbek jolyn aýyldan bastaǵandy jón kóredi. Kazinform tilshisi jas mamandardyń qalaı tańdaý jasaǵanyn surady.