Qazaqstanda dıabetke shaldyqqandar sany resmı málimetke qaraǵanda eki ese kóp - zertteý nátıjesi
ASTANA. QazAqparat - Búgin Astanadaǵy EKSPO kórmesi aıasynda qant dıabeti máselelerine arnalǵan xalyqaralyq konferentsııa uıymdastyryldy.
Onda NOMAD atty ekijyldyq zertteýdiń nátıjesi jarııalandy. Zertteýge qaraǵanda, Qazaqstanda qant dıabetine shaldyqqan adamdardyń sany eki esege kóp bolyp tur. Aldaǵy ýaqytta osy sanattaǵy naýqastar kúrt artýy yqtımal, dep xabarlaıdy QazAqparat tilshisi.
Zertteý jobasynyń úılestirýshisi Naılıa Toqtarovanyń aıtýynsha, qant dıabetine arnalǵan alǵashqy skrınıgtik baǵdarlamalardyń málimetteri durys bolmaı shyqty. Sebebi osy aýrýǵa shaldyqqandardyń kóbisi tirkeýge turmaǵan. "Biz bolsaq, qant dıabetiniń taralý kórsetkishin anyqtaýdy kózdedik. Osylaısha, respýblıka boıynsha atalǵan kórsetkishtiń 6,3 paıyzdy qurap otyrǵanyn anyqtadyq. Ol resmı málimetterden eki esege artyq bolyp tur. Demek, adamdar qant dıabetimen aýyryp júrse de, tirkeýge turmaıdy. Sosyn dıabetke shaldyǵýǵa jaqyn júrgender az emes. Olardyń sany 38,6 paıyzdy quraıdy. Bul degenimiz, aldaǵy 5-10 jyldyń ishinde naýqastardyń sany kúrt ósedi. Sóıtip, densaýlyq saqtaý salasyna biraz shyǵyndalýǵa týra keledi", - deıdi Toqtarova.
NOMAD aıasyndaǵy zertteý sharalary tórt aımaqta - Astana, Almaty, Qaraǵandy men Shymkentte júrgizildi. Budan bólek, osy qalalarǵa jaqyn aýyldy jerler de qamtyldy. Zertteýge barlyǵy 14,5 myń adam qatysty. Olar synama tapsyryp, dıabettiń bar-joǵyn tekserip alýǵa múmkindik aldy.
Aıta keteıik , búginde álem boıynsha dıabettiń saldarynan árbir 20 sekýnd saıyn bir adam ampýtatsııaǵa ushyraıdy. «Atalǵan problema bizde de óte ózekti bolyp tur. Qazaqstanda sońǵy on jyldyń ishinde dıabet aýrýyna shaldyqqan adamdardyń sany eki esege ósti. Olardyń basym bóligi ekinshi tıptegi dıabetpen aýyrady», - deıdi QR Densaýlyq saqtaý vıtse-mınıstri Lázzat Aqtaeva.
