Qazaqstanda derekter ortalyqtaryn salǵanda úsh máselege nazar aýdarý qajet – halyqaralyq sarapshy

ASTANA. KAZINFORM – Qazaqstanda derekter ortalyqtaryn salǵanda jabdyqtardy durys tańdaý, sý tapshylyǵy men aýa sapasyn eskerý qajet. Bul týraly halyqaralyq sarapshy Konstantınos Balaras Astanada ótken paneldik sessııada aıtty.

Konstantınos Balaras
Foto: Kazinform

Sarapshynyń sózinshe, Qazaqstannyń sýyq qysy derekter ortalyqtary úshin tıimdi. Óıtkeni jyldyń osy mezgilinde syrttaǵy salqyn aýany serverlerdi salqyndatýǵa paıdalanýǵa bolady. Bul elektr energııasyn únemdeýge múmkindik beredi.

– Mysaly, qysta úıińiz ystyq bolsa, terezeni sál ashyp qoıasyz. Sol sııaqty derekter ortalyqtaryn da syrttaǵy sýyq aýanyń kómegimen salqyndatýǵa bolady. Bul – olardyń jumys isteýi úshin óte qolaıly jaǵdaı, - dep túsindirdi Konstantınos Balaras.

Al jazda jaǵdaı ózgeredi. Kún ysyǵan kezde serverlerdi salqyndatý úshin arnaıy jabdyqtar qajet. Sondyqtan sarapshy elektr energııasyn az tutynatyn ári tıimdi jumys isteıtin tehnologııalardy tańdaýdyń mańyzyn atap ótti.

Konstantınos Balaras
Foto: Kazinform

Degenmen spıkerdiń sózinshe, másele tek elektr energııasyna kep tirelmeıdi.

– Keıbir salqyndatý júıelerine kóp mólsherde sý qajet. Al sý tapshylyǵy bar óńirlerde bul derekter ortalyqtarynyń jumysyna qıyndyq týǵyzýy múmkin, - dedi ol.

Sonymen qosa Konstantınos Balaras aýa sapasyna da nazar aýdardy. Onyń aıtýynsha, Qazaqstannyń keıbir óńirlerinde bolatyn shańdy daýyldar jabdyqtardyń jumysyna keri áser etýi múmkin. Sol sebepti derekter ortalyqtaryn jobalaǵanda aýany súzý júıelerin de qarastyrý qajet.

– Eń aldymen úsh máselege mán berý kerek. Olar – jabdyqtardy durys tańdaý, sý tapshylyǵy jáne aýa sapasy. Injenerler osy jaǵdaılardyń barlyǵyn jan-jaqty zerttep, tıimdi sheshim qabyldaýy tıis, – dedi sarapshy.

Konstantınos Balarastyń pikirinshe, Qazaqstanda derekter ortalyqtaryn salǵanda qystyń sýyǵy men jazdyń ystyǵyn qatar eskergen jón. Bul elektr energııasy men sýdy únemdeýge, sondaı-aq ortalyqtardyń jumysyn tıimdi uıymdastyrýǵa múmkindik beredi.

Aıta keteıik, buǵan deıin Konstantınos Balaras Qazaqstandaǵy elektr energııasynyń tapshylyǵyn azaıtý úshin jańa qýat kózderin iske qosýmen shektelmeı, energııany únemdeýge jáne kórshi memlekettermen elektr almasý múmkindikterin keńeıtýge basymdyq berý qajet ekenin aıtqan edi.

Aıta keteıik, Ulttyq statıstıka bıýrosy memlekettik organdar men kompanııalardyń derekterin, sondaı-aq jasandy ıntellekt múmkindikterin keńinen paıdalanýdy josparlap otyr.