Qazaqstanda derbes derekterdi qorǵaýdyń jańa quqyqtyq tetikteri engizildi
ASTANA. KAZINFORM — Qazaqstanda jańa Konstıtýtsııa aıasynda azamattardyń jeke derekterin qorǵaý konstıtýtsııalyq deńgeıde bekitilip, tsıfrlyq quqyqtar júıesi jańa kezeńge ótti. Jeke aqparattyń qaýipsizdigine kepildik beretin normalar jasandy ıntellekt dáýirindegi derekterdi qorǵaýdyń quqyqtyq jáne tehnologııalyq tetikterin kúsheıtýdi kózdeıdi. Bul týraly vedomstvonyń baspasóz qyzmeti málim etti.
Qazaqstan Respýblıkasynyń jańa Konstıtýtsııasy azamattardyń jeke derekterin qorǵaýdy memlekettiń basty basymdyqtarynyń biri retinde bekitti. Endi ár adamnyń jeke ómiriniń qolsuǵylmaýshylyǵyna jáne jeke aqparattyń zańsyz jınalýynan, óńdelýinen, paıdalanylýynan nemese saqtalýynan qaýipsizdigine quqyǵy Konstıtýtsııanyń 21-babymen kepildendirilgen. Bul jańashyldyq Qazaqstannyń ozyq tsıfrlyq memleket retinde qaýipsiz damýy úshin berik quqyqtyq negiz qalaıdy.
— Jasandy ıntellekt dáýirinde azamattardyń tsıfrlyq quqyqtaryn qorǵaý — tsıfrlyq memleketke degen senimniń irgeli sharty. Bul normalardyń konstıtýtsııalyq deńgeıde bekitilýi qazaqstandyqtardyń quqyqtaryn qorǵaýdy sapalyq jańa deńgeıge kóteredi jáne jańartylǵan Konstıtýtsııa tehnologııalardyń tek adam ıgiligi úshin qyzmet etetinine, al zańnyń tsıfrlyq álemde árbir azamat úshin senimdi qalqan bolatynyna kepildik beretin qaýipsiz ári ádil qoǵam qurýǵa jol ashady, — dedi qabyldanǵan ózgeristerdiń strategııalyq mańyzyna toqtalyp Jasandy ıntellekt jáne tsıfrlyq damý mınıstri Jaslan Mádıev.
Jańa konstıtýtsııalyq qaǵıdattardy keshendi iske asyrý Tsıfrlyq kodeks, Derbes derekter týraly zań jáne Jasandy ıntellekt týraly zań normalarynda kórinis tabady. Atap aıtqanda, jeke derekterdiń ózindik uǵymyn oǵan ıdentıfıkatorlardy qosý arqyly zańnamalyq turǵydan naqtylaý qarastyrylǵan. Sonymen qatar, aqparatty avtomattandyrylǵan óńdeýge qatań talaptar engizý, sondaı-aq azamattarǵa eGov Mobile mobıldi qosymshasy arqyly derekterdi óńdeýge bergen kelisimin kez kelgen ýaqytta qaıtaryp alý múmkindigin berý kózdeledi.
— Memlekettik jáne jeke platformalardyń qaýipsizdigin túbegeıli arttyrý úshin 100 myńnan astam qoljetimdiligi shekteýli derbes derekter jazbasyn óńdeıtin operatorlar úshin mindetti bıometrııalyq aýtentıfıkatsııa engizildi. Azamattarǵa jeke aqparatty joıý, anonımdeý jáne óńdeýdi shekteý quqyqtary resmı túrde bekitildi, sondaı-aq óńdeý maqsattaryna qol jetkizilgennen keıin ony saqtaý merzimderine qatań talaptar qoıyldy, — delingen habarlamada.
Zańnamany odan ári damytý derbes derekterdi qorǵaýdyń eń zamanaýı tehnologııalyq quraldaryn, sonyń ishinde jasyrý jáne heshteý quraldaryn engizýdi kózdeıdi. Memleket aqparattyq júıeler arasyndaǵy qaýipsiz ıntegratsııaǵa basymdyq bere otyryp, memlekettik derekqorlardan aqparat jıyntyǵyn tikeleı júktep alýdy shekteýge nıetti.
Budan bólek, elimizde derbes derekterdiń iri operatorlaryna naqty jikteý engizilip, olardyń tizilimi jasaqtalýda. Operatorlar endi derekterdi óńdeý protsesteri bastalǵanǵa deıin memleketti aldyn ala habardar etýge, sondaı-aq qaýipsizdik ıntsıdentteri men derekterdiń syrtqa ketý faktileri týraly ýákiletti organdy jáne azamattardy dereý habardar etýge mindetti.
