Qazaqstanda derbes derekterdi qorǵaý talaptary kúsheıtilmek

ASTANA. KAZINFORM — Qazaqstanda elektrondyq aqparattyq resýrstardaǵy qoljetimdiligi shekteýli derbes derekterdi qorǵaý talaptaryn jetildirýge baǵyttalǵan buıryq jobasy Ashyq NQA portalyna qoǵamdyq talqylaýǵa shyǵaryldy. 

Atap aıtqanda, ózgerister «Qazaqstan Respýblıkasynyń keıbir zańnamalyq aktilerine tsıfrlandyrý, kólik jáne kásipkerlik máseleleri boıynsha ózgerister men tolyqtyrýlar engizý týraly» 2026 jylǵy 9 qańtardaǵy Zańyn iske asyrý maqsatynda engizilip otyr.

— Jobanyń negizgi maqsaty — elektrondyq aqparattyq resýrstardaǵy derbes derekterdi saqtaý, óńdeý jáne taratý protsesteriniń qorǵalý deńgeıin arttyrý, — delingen qujatta.

Qujatty qabyldaý teris áleýmettik-ekonomıkalyq saldarǵa ákelmeıdi. Sonymen qatar ony iske asyrý qosymsha qarjylyq shyǵyndardy talap etpeıdi dep atap ótilgen.

Aıta keteıik, «derbes derekter» uǵymynyń anyqtamasy naqtylandy. Endi oǵan elektrondyq, qaǵaz nemese ózge de materıaldyq tasymaldaǵyshta tirkelgen, naqty nemese anyqtalatyn tulǵaǵa qatysty derekter, sonyń ishinde bıometrııalyq derekter de kiredi.

Sonymen qatar Úkimettiń keńeıtilgen otyrysynda Memleket basshysy Úkimet tıisti mekemelermen birge azamattardyń derekterin qorǵaý máselesin keshendi túrde muqııat saralaýy tıis degen edi.