Qazaqstanda depozıtterdi dollarlandyrý deńgeıi 41 paıyzǵa tómendedi

NUR-SULTAN. QazAqparat - Depozıtterdi dollarlandyrý deńgeıi 41,9 paıyzǵa deıin tómendedi. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Osy jylǵy aqpannyń sońynda depozıtter kólemi valıýta bóliginiń esebinen 2,3 paıyzǵa jyl basynan bastap tómendep, 18 trln teńge boldy. Shetel valıýtasyndaǵy depozıtter 5,2 paıyzǵa nemese 424 mlrd teńgege tómendedi. Ulttyq valıýtadaǵy salymdar 0,2 paıyzǵa shamaly ǵana qysqardy. Nátıjesinde depozıtterdi dollarlandyrý deńgeıi ótken jylǵy jeltoqsandaǵy 43,1 paıyzben salystyrǵanda bıylǵy aqpanda 41,9 paıyzǵa deıin tómendedi»,- dedi Erbolat Dosaev.

Onyń dereginshe, jyl basynan bastap ekonomıkaǵa kredıtter negizinen qysqa merzimdi kredıtterdiń 4,5 paıyzǵa nemese 92 mlrd teńgege qysqarýyna baılanysty aqpannyń sońynda 13,8 trln teńgege deıin azaıdy. Uzaq merzimdi kredıtter 11,9 trln teńgege deıin 0,3 paıyzǵa ulǵaıdy.