Qazaqstanda densaýlyq saqtaý jáne áleýmettik qyzmetterdiń joǵary bilikti mamandaryna suranys kóp
ASTANA. QazAqparat - Elimizde densaýlyq saqtaý jáne áleýmettik qyzmetter salasynda biliktilik deńgeıi joǵary mamandarǵa suranys 1 432 adamdy quraıdy. Bundaı biliktilik deńgeıi joǵary mamandarǵa suranys ónerkásip salasynda - 847 adam, bilim berýde - 758 adamdy qurap otyr. Bul týraly Ulttyq ekonomıka mınıstrligi Statıstıka komıtetiniń baspasóz qyzmetinen habarlady.
«Ekonomıkalyq qyzmet túrleri bólinisinde bos jumys oryndarynyń edáýir kóp sany ónerkásipte - 6 210 birlik, densaýlyq saqtaý jáne áleýmettik qyzmetter salasynda - 3 279 birlik, eń azy jyljymaıtyn múlikpen jasalatyn operatsııalarda - 302 birlik boıynsha qalyptasqan.
Ónerkásipte (7 462 adam), qurylysta (3 523 adam), densaýlyq saqtaý jáne áleýmettik qyzmetter salasynda (2 802 adam) kadrlarǵa edáýir kóp tapshylyq anyqtaldy, qyzmetkerlerge kútiletin qajettiliktegi olardyń úlesi 56,3% qurady», delingen baspasóz baıanynda.
Komıtet málimetine qaraǵanda, jeke menshik nysandaǵy kásiporyndar men uıymdarda qyzmetkerlerge kútiletin qajettilik jalpy 2015 jylǵa 16 498 adamdy quramaq. Al memlekettik menshik nysandaǵy kásiporyndar men uıymdarda basym kóp qajettilik densaýlyq saqtaý jáne áleýmettik qyzmetter salasyna keledi (2 396 adam). Memlekettik menshik nysanyndaǵy kásiporyndardyń qyzmetkerlerge jalpy kútiletin qajettiliktegi úlesi 53,8% qurady.
«Óńirler bólinisinde bos jumys oryndarynyń basym kóp sany Almaty qalasynda - 4 872 birlik, Astana qalasynda - 3 804 birlik, Qaraǵandy oblysynda - 1 973 birlik. Almaty qalasynda bos jumys oryndarynyń kóbi ónerkásipte, sonymen qatar kóterme jáne bólshek saýda men avtomobılderdi jóndeý salasynda bolsa, Astana qalasynda densaýlyq saqtaý jáne áleýmettik qyzmetter salasynda (1 066 birlik), Qaraǵandy oblysynda kólik jáne qoımalaý salasynda (893 birlik) qalyptasqan», delingen baspasóz baıanynda.
Sonymen bir mezette, bos oryndardyń eń az sany Qyzylorda oblysynda - 204 birlik, Jambyl oblysynda - 335 birlik, Aqtóbe oblysynda - 379 birlik bolsa, qyzmetkerlerge eń az qajettilik Shyǵys Qazaqstan oblysy (135 adam), Aqmola (141 adam), Qyzylorda oblystarynda (168 adam) jáne Aqtóbe oblysynda (222 adam) baıqalǵan.
