Qazaqstanda Densaýlyq festıvali bastaldy

ASTANA. QazAqparat - Búgin Qazaqstanda Salaýatty ómir saltyn qalyptastyrý problemalary ortalyǵynyń uıymdastyrýshylyq-ádistemelik qoldaýymen «Biz salaýatty ómir saltyn qoldaımyz!» atty uranmen Densaýlyq festıvali bastaldy, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Sharanyń maqsaty - fızıkalyq belsendilikti arttyrý jáne durys tamaqtaný talaptaryn saqtaı otyryp, jaman qylyqtardan arylý, sonymen birge densaýlyq saqtaý ádetterin qalyptastyrý arqyly qoǵam nazaryn densaýlyqty saqtaý men ony qorǵaýdyń ortaq jaýapkershiligine aýdarý.

Densaýlyq festıvaliniń aıasynda alǵashqy medıtsınalyq-sanıtarııalyq kómek uıymdarynda ashyq esik kúnderi ótedi: adamdar kóp shoǵyrlanǵan jerlerde salaýatty ómir saltynyń ártúrli baǵyttary boıynsha terapevter, pedıatrlar, jalpy praktıka dárigerleri, endokrınologtar, pýlmonologtardyń tegin konsýltatsııasy kórsetiletin «densaýlyq qalashyǵy» qurylady; jastar men jasóspirimder arasynda «Biz densaýlyǵymyzdy baǵalaımyz!» atty taqyrypta túrli baıqaýlar men fleshmobtar, sporttyq is-sharalardy ótkizý josparlanyp otyr.

Densaýlyq festıvali aıasynda ótkiziletin sharalar ımmýnıtettiń turaqty bolýyna, juqpaly, júrek-qantamyrlary aýrýlarynyń, tumaýmen syrqattaný qaterlerin azaıtýǵa, ómir súrý uzaqtyǵyn ulǵaıtýǵa, eńbek ónimdiligin arttyrýǵa, jalpy ózin-ózi jaqsy sezinýge yqpal etedi.

Densaýlyq festıvali 11 maýsym kúni Astana ýaqytymen saǵat 11:00-de respýblıka turǵyndarynyń qatysýymen bir sáttik «Densaýlyq marafony» sharasymen aıaqtalmaq.