Qazaqstanda densaýlyq saqtaýdy damytý tujyrymdamasy 2029 jylǵa deıin uzartyldy
ASTANA. KAZINFORM — Qazaqstan Úkimetiniń 2026 jylǵy 11 naýryzdaǵy qaýlysymen densaýlyq saqtaýdy damytý tujyrymdamasyna ózgerister engizildi. Qujatqa sáıkes, tujyrymdamany iske asyrý merzimi 2029 jyldyń sońyna deıin uzartyldy.
Jańartylǵan tujyrymdama densaýlyq saqtaý júıesinde anyqtalǵan máseleler men halyqaralyq tájirıbeni eskere otyryp ázirlengen. Qujatta salany odan ári damytýdyń baǵyty aıqyndalyp, tıimdi ári ornyqty densaýlyq saqtaý júıesin qalyptastyrý kózdelgen.
Negizgi baǵyttar retinde medıtsınalyq kómektiń qoljetimdiligi men sapasy arasyndaǵy teńgerimdi saqtaý, halyq densaýlyǵyn keshendi basqarýdy damytý, emdelýshige baǵyttalǵan qyzmet kórsetý úlgisin engizý jáne salany tsıfrlandyrýdy keńeıtý belgilengen.
Sondaı-aq medıtsınalyq ǵylymdy damytý, kadr áleýetin arttyrý, ınfraqurylymdy jańǵyrtý jáne farmatsevtıka óndirisin kúsheıtýge baǵyttalǵan sharalar qarastyrylǵan.
Negizgi qaǵıdattar qatarynda medıtsınalyq kómekke teń qoljetimdilikti qamtamasyz etý, aýrýdyń aldyn alý men densaýlyqty saqtaýǵa basymdyq berý, basqarýdyń ashyqtyǵy, sheshim qabyldaýda derekterdi tıimdi paıdalaný, sondaı-aq qoǵamdyq densaýlyq salasyndaǵy daǵdarystarǵa júıeniń daıyn bolýy kózdelgen.
Sonymen qatar tujyrymdamany iske asyrýǵa arnalǵan is-qımyl jospary bekitildi.
Kútiletin nátıjege sáıkes, 2029 jylǵa qaraı Qazaqstanda halyqtyń ortasha ómir súrý uzaqtyǵy 77 jasqa deıin ulǵaıyp, negizgi juqpaly emes aýrýlardan bolatyn merziminen buryn ólim-jitim deńgeıi tómendeýi tıis.
Buǵan deıin Qalqan tsıfrlyq platformasy mindetti áleýmettik medıtsınalyq saqtandyrý júıesine engiziletini habarlanǵan bolatyn.
