Qazaqstanda densaýlyq saqtaý júıesin tsıfrlandyrý kúsheıtiledi
ASTANA. KAZINFORM – Úkimette QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen ótken keńeste Memleket basshysynyń tapsyrmalaryn iske asyrý aıasyndaǵy densaýlyq saqtaý salasyn tsıfrlandyrý máseleleri qaraldy.
Keńeste Densaýlyq saqtaý mınıstrligi densaýlyq saqtaý júıesin tsıfrlyq transformatsııalaý boıynsha atqarylyp jatqan jumystar týraly esep berdi.
Densaýlyq saqtaý vıtse-mınıstri Erbol Ospanovtyń aıtýynsha, e-Densaulyq biryńǵaı arhıtektýrasy aıasynda memlekettik aqparattyq júıelerdi kezeń-kezeńimen biriktirý jumystary júrgizilip jatyr.
– Negizgi maqsat – bytyrańqy tsıfrlyq sheshimderden bas tartyp, derekter bir ret qalyptastyrylyp, salaǵa qatysýshy barlyq tarap qaıta engizýsiz paıdalana alatyn biryńǵaı júıege kóshý, – dedi Erbol Ospanov.
Onyń málimetinshe, densaýlyq saqtaý salasyndaǵy memlekettik aqparattyq júıeler jeti negizgi tsıfrlyq komponentke biriktirilýde. Jyl sońyna deıin Biryńǵaı densaýlyq saqtaý portaly men Biryńǵaı memlekettik medıtsınalyq aqparattyq júıeni iske qosý josparlanǵan.
Sonymen qatar Biryńǵaı medıtsınalyq derekter qoımasyn engizý jumystary jalǵasyp jatyr. Qazirgi ýaqytta oǵan 12-den astam medıtsınalyq aqparattyq júıe qosylǵan.
Osy júıe negizinde patsıenttiń Elektrondyq densaýlyq pasporty qalyptastyrylady. Onda adamnyń óńirine nemese medıtsınalyq uıymyna qaramastan kórsetilgen barlyq medıtsınalyq kómektiń tarıhy jınaqtalady.
Mınıstrlik málimetinshe, bul dárigerlerge «bir tereze» qaǵıdaty boıynsha jumys isteýge múmkindik beredi. ıAǵnı medıtsına qyzmetkeri patsıenttiń aýrý tarıhyn, taldaý nátıjelerin, taǵaıyndaýlar men buryn kórsetilgen qyzmetterdi bir júıeden kóre alady.
Al patsıentter úshin medıtsınalyq qyzmet alý ýaqyty qysqaryp, kómektiń sapasy artady dep kútilýde.
Keńeste medıtsına qyzmetkerleriniń qaýipsizdigin qamtamasyz etýge baǵyttalǵan tsıfrlyq jobalar da tanystyryldy. Olardyń qatarynda jedel járdem jáne alǵashqy medıtsınalyq-sanıtarııalyq kómek brıgadalary úshin smart-beınejetondar engizý, ıntellektýaldy beıneanalıtıkasy bar beınebaqylaý júıesin qurý, dári-dármek pen vaktsınalardy saqtaý jaǵdaıyn baqylaýǵa arnalǵan «Sýyq tizbek» júıesin damytý jáne aýyldyq medıtsınalyq uıymdar úshin telemedıtsına servısterin keńeıtý bar.
Sondaı-aq keńeste aýyl turǵyndaryna medıtsınalyq kómektiń qoljetimdiligin arttyrýǵa baǵyttalǵan Ulttyq jobanyń iske asyrylý barysy qaraldy.
Búginde josparlanǵan 655 alǵashqy medıtsınalyq-sanıtarııalyq kómek nysanynyń qurylysy tolyq aıaqtalǵan. Onyń 639-y aýdandyq aýrýhanalardyń balansyna berilip, 587 nysan medıtsınalyq qyzmet kórsetýge lıtsenzııa alǵan.
Budan bólek, 32 ortalyq aýdandyq aýrýhanany jańǵyrtý jumystary jalǵasyp jatyr.
Keńes qorytyndysy boıynsha Aıda Balaeva densaýlyq saqtaý salasynyń tsıfrlyq ınfraqurylymyn damytý jumystaryn jalǵastyrýdy, Ulttyq joba is-sharalarynyń ýaqytyly oryndalýyn qamtamasyz etýdi jáne bul baǵyttaǵy jumysty oblys ákimderiniń orynbasarlary deńgeıinde jeke baqylaýǵa alýdy tapsyrdy.
Aıta keteıik, DSM balalar densaýlyǵyn nyǵaıtýǵa baǵyttalǵan «Bastaý» is-sharalar keshenin ázirlemek.
