Qazaqstanda dene shynyqtyrý páni muǵalimderine ústemaqy tólenedi

NUR-SULTAN. QazAqparat – Bıyldan bastap mektep qabyrǵasyndaǵy sporttyq sektsııany ótkizetin dene shynyqtyrý pán muǵalimderine qosymsha ústemaqy tólenedi. Bul týraly QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Sporttyq sektsııalar ashyp balalar sportyn damytamyz deımiz, biraq onyń ekinshi jaǵy bar. Ony júrgizetin adamnyń eńbegin umytpaǵan jón. Sondyqtan da sporttyq sektsııa jetekshileriniń jalaqysyna qosymsha 17 myń teńge ústemaqy tólenedi. Balalarǵa arnalǵan sporttyq sektsııa aptasyna 3 ret ótip turýy tıis. Ony mekteptiń dene shynyqtyrý páni júrgizedi. Buǵan deıin sporttyq sektsııalar tegin túrde ótkiziletin, endigi ýaqytta oǵan qosymsha ústemaqy tólenedi. Oqýyshylarda tańdaý bolý úshin sporttyń barlyq túrin qamtýǵa tyrysamyz. Onyń ishinde fýtbol, voleıbol, basketbol, shahmat jáne taǵy basqa. Sondaı-aq, ulttyq sport túrleri de bar», - dedi A. Aımaǵambetov elordada ótip jatqan ulttyq mektep sport lıgasy barysynda.

Mınınstrdiń aıtýynsha, atalǵan jańashyldyq bıyl qyrkúıek aıynan bastap qolǵa alyndy.

«Bizdiń maqsat – balalardy kóptep sportqa tartý, baýlý. Sportty ilgeriletýge qatysty jumysty Mádenıet jáne sport mınıstrligimen birlesip júrgizetin bolamyz», - deıdi ol.

Buǵan deıin A. Aımaǵambetov endigi ýaqytta orta bilim berý mektepterinde bir emes birneshe sport zaldan bolatynyn aıtty.