Qazaqstanda dene shynyqtyrý páninen dáris beretin qansha maman bar
ASTANA. KAZINFORM – QR Týrızm jáne sport mınıstrligi Qazaqstanda dene shynyqtyrý jáne sport sabaqtarynan dáris beretin qansha maman bar ekenin jarııalady.
Atalǵan vedmstvo statıstıkalyq málimetterge súıene otyryp, qazirgi tańda elimizde dene shynyqtyrý jáne sport sabaqtaryn 67 755 shtattyq qyzmetker ótkizetinin atap ótti. Bul – 2022 jylmen salystyrǵanda 1 433 adamǵa kóp.
Aýyldyq jerlerde 31 329 dene shynyqtyrý qyzmetkeri jumys isteıdi (2022 jyly – 29 796 adam).
Buǵan deıingi esepti kezeńdegi derekterge sáıkes, keı óńirlerde shtattyq qyzmetkerlerdiń sany artqany baıqalady. Dene shynyqtyrý salasynyń shtattyq qyzmetkerleriniń sany artýy boıynsha Almaty (+595), Atyraý (+222), Jetisý (+129) jáne Pavlodar oblystary (+112) kósh bastap keledi.
Respýblıka boıynsha 10 myńnan asa jalpy bilim berý uıymdary bar, onda 32 myńnan astam dene shynyqtyrý salasynyń oqytýshy-muǵalimderi eńbek etedi. Onyń ishinde aýyldy jerlerde 19 myńnan astam adam jumys isteıdi.
Budan bólek, bilim berý jáne sport mekemelerinde sport baǵytyn damytý úshin 15 myńnan asa jattyqtyrýshy-oqytýshy jumys isteıdi, onyń ishinde aýylda 5 myńnan asa jattyqtyrýshy shákirtterin tárbıeleýge, oqytýǵa jáne sheberlikterin shyńdaýǵa, fýnktsıonaldyq múmkindikterin damytýǵa baǵyttalǵan oqý-jattyǵý jumysyn júrgizip, sportshylardy jańa jetistikterge jetýge yntalandyrady.
Sonymen qatar buǵan deıingi esepti kezeńmen salystyrǵanda jattyqtyrýshy-oqytýshylar sany 321 adamǵa artqan. 2023 jyly 13 óńirde oń dınamıka tirkelgen. Atap aıtqanda, eń úlken ósim Almaty (+318), Atyraý (+142) jáne Jetisý oblystarynda (+122) baıqalady.
«Qazirgi qoǵamda buqaralyq sportty damytý basty mindetterdiń biri. Deni saý ultty qalyptastyrý úshin sport ınfraqurylymyn damytyp qana qoımaı, dene shynyqtyrý jáne sport salasynyń qyzmetkerlerin kadrlyq resýrstarmen qamtamasyz etý arqyly sporttyń qoljetimdiligin arttyrý qajet. Joǵary jetistikter sportynyń barlyq nátıjesi buqaralyq jáne balalar sportynyń damýyna tikeleı baılanysty. Biz dene shynyqtyrýdy nasıhattaý, sondaı-aq sporttyń qoljetimdiligin arttyrý boıynsha úlken jumys atqaryp jatyrmyz, jaqyn arada bul jumys qarqyndy túrde jalǵasatyn bolady», - dedi Týrızm jáne sport mınıstriniń orynbasary Serik Jarasbaev.
