Qazaqstanda demografııalyq ahýaldy baǵalaýdyń jańa tásilderi usynyldy

Astanada QR Strategııalyq josparlaý jáne reformalar agenttiginiń uıymdastyrýymen «Táýekelderden turaqtylyqqa: Qazaqstandaǵy demografııalyq ahýal týraly» taqyrybynda «Josparlaý» saraptamalyq-dıalogtik klýbynyń otyrysy ótti.

Іs-shara barysynda Demografııalyq ahýaldy baǵalaý jónindegi ulttyq baıandamanyń tujyrymdamasy, Óńirlerdiń demografııalyq turaqtylyǵy ındeksiniń ádisnamasy jáne demografııalyq protsesterdi taldaýdyń zamanaýı tásilderi talqylandy.

Otyrysty ashqan Agenttik tóraǵasynyń orynbasary Oljas Tóleýov «Josparlaý» saraptamalyq-dıalogtik klýby áleýmettik-ekonomıkalyq saıasattyń ózekti máselelerin kásibı turǵyda talqylaýǵa arnalǵan alań ekenin atap ótti.

– Kezekti otyrys demografııalyq damý máselelerine jáne osy saladaǵy memlekettik saıasatty jetildirýge arnaldy. Mundaı saraptamalyq talqylaýlar ǵylymı negizdelgen sheshimder qabyldaý úshin mańyzdy, – dedi Oljas Tóleýov.

Saraptamalyq alań jumysyna Ulttyq statıstıka bıýrosy, Dúnıejúzilik bank, BUU Halyqtyń qonystanýy salasyndaǵy qory (UNFPA), ǵylymı-zertteý ortalyqtary men saraptamalyq uıymdardyń ókilderi qatysty.

Otyrys barysynda Demografııalyq protsesterdi taldaý jáne boljaý ortalyǵy qyzmetiniń aralyq qorytyndylary usynyldy. Qatysýshylar demografııalyq protsesterdi monıtorıngteý jáne boljaý júıesin jetildirý, zertteýlerdiń ádisnamalyq bazasyn damytý máselelerin qarastyrdy.

Sondaı-aq Qazaqstandaǵy Demografııalyq ahýaldy baǵalaý jónindegi ulttyq baıandamany ázirleýge erekshe nazar aýdaryldy. Qujat eldiń demografııalyq damýyn keshendi baǵalaýǵa baǵyttalǵan.

– Demografııalyq protsesterdi áleýmettik-ekonomıkalyq, aýmaqtyq jáne medıtsınalyq-áleýmettik faktorlarmen ózara baılanysta qarastyrý mańyzdy. Bul halyqtyń jas qurylymyndaǵy ózgeristerdi, týý men ólim-jitim kórsetkishterin, kóshi-qon jáne basqa da úrdisterdi jan-jaqty baǵalaýǵa múmkindik beredi, – dep atap ótti sarapshylar.

Kezdesýde Dúnıejúzilik bankpen birlesip ázirlenip jatqan Óńirlerdiń demografııalyq turaqtylyǵy ındeksiniń ádisnamasy da tanystyryldy.

Atalǵan ındeks óńirlerdegi demografııalyq protsesterdiń jaı-kúıin baǵalaýǵa, aýmaqtyq teńgerimsizdikter men yqtımal táýekelderdi anyqtaýǵa múmkindik beredi.

Dúnıejúzilik banktiń jetekshi ekonomısi, ındeks ádisnamasynyń teń avtory Mıhaıl Lokshınniń qatysýymen ótken talqylaýda kórsetkishter júıesin qalyptastyrý jáne ındeksti tájirıbede qoldaný máseleleri qaraldy.

Sonymen qatar qatysýshylarǵa reprodýktıvtik densaýlyq, ana densaýlyǵyn qorǵaý jáne demografııalyq damýǵa áser etetin faktorlar týraly taldamalyq baıandama usynyldy.

Otyrys qorytyndysy boıynsha aıtylǵan usynystar Demografııalyq ahýaldy baǵalaý jónindegi ulttyq baıandamany ázirleý, Óńirlerdiń demografııalyq turaqtylyǵy ındeksin jetildirý jáne demografııalyq protsesterdi boljaý júıesin damytý kezinde eskeriletin bolady.

Aıta keteıik, Qazaqstanda demografııa boıynsha alǵashqy Ulttyq baıandama ázirlenedi.