Qazaqstanda demografııa jáne kóshi-qon salasyn retteıtin memlekettik organ qurý usynyldy

ASTANA. KAZINFORM — Elimizde halyq sanyn kóbeıtý jáne ishki kóshi-qon saıasatyn retteý maqsatynda quzyrly organ qurý ıdeıasy ortaǵa salyndy.

— Demografııa jáne kóshi-qon salasyn retteıtin bólek memlekettik organ qajet. Bolmasa kóshi-qon saıasaty boıynsha memlekettik qyzmet ókiletin kúsheıtý kerek. Іshki kóshi-qon sonyń ishinde óńir arasyndaǵy statıstıkany keńeıtip, onyń ishinde ózbek, uıǵyr, dúngen, ýkraın, káris sııaqty basqa da ulttarǵa qatysty derekterdi engizý, — dedi Qoldanbaly etnosaıası zertteýler ınstıtýty-qoldanbaly zertteýler ortalyǵynyń dırektory Dinmuhammed Ǵalı Senat qabyrǵasynda ótken is-shara barysynda.

Onyń aıtýynsha, kóshi-qon máselesine qatysty sheshimdi júıeli túrde qarastyrý qajet. 

— Júıeli ári aldyn ala josparlaǵan qadamdar kóshi-qon salasyndaǵy áleýmettik damýdyń kózi ǵana emes turaqty damý, básekege qabiletti qoǵam qurý jolyndaǵy mańyzdy resýrs, — deıdi ol.

Buǵan deıin etnosaıası ınstıtýt basshysy elimizdegi ishki kóshi-qon jáne shetelden keletin eńbek mıgranttaryna qatysty oıyn ortaǵa salǵan edi. 

Búgin Senattyń Áleýmettik-mádenı damý jáne ǵylym komıtetinde «Demografııalyq ósý –ulttyń strategııalyq artyqshylyǵynyń negizi» taqyrybynda byltyr ótken Úkimet saǵatynda qabyldanǵan usynymdardy iske asyrý qorytyndylaryn talqylaýǵa arnalǵan keńeıtilgen otyrys ótti. 

Eńbek jáne halyqty áleýmettik qorǵaý vıtse-mınıstriniń málimetinshe, qazaqstandyqtar soltústik óńirlerden kóshýdi jalǵastyryp jatyr.