Qazaqstanda demografııa boıynsha alǵashqy Ulttyq baıandama ázirlenedi
ASTANA. KAZINFORM — QR SJRA Ulttyq statıstıka bıýrosy demografııa máseleleri boıynsha BUU Halyqty qonystandyrý qorymen (ıÝNFPA) yntymaqtastyqty keńeıtýdi josparlap otyr, dep habarlaıdy vedomstvonyń baspasóz qyzmeti.
Bul baǵyttaǵy ózara is-qımyl máseleleri Qazaqstandaǵy BUU halyqty qonystandyrý qorynyń eldik dırektory Chınve Ogbonnamen ótken kezdesý barysynda talqylandy.
— Taraptar Qazaqstandaǵy demografııalyq ahýal jónindegi Ulttyq baıandamany ázirleý aıasynda birlesken áleýmettik zertteý júrgizý múmkindigin qarastyrdy. Zertteý nátıjelerin demografııalyq jaǵdaıdy baǵalaý jónindegi alǵashqy Ulttyq baıandamany jáne óńirlerdiń demografııalyq ornyqtylyq ındeksin ázirleýde paıdalaný josparlanyp otyr. Atalǵan ındeks halyqtyń udaıy ósý qabiletin, qurylymdyq tepe-teńdikti saqtaýyn jáne áleýmettik-ekonomıkalyq ári mádenı ózgeristerge uzaq merzimdi beıimdelý deńgeıin kórsetedi, — delingen habarlamada.
Óz kezeginde ıÝNFPA demografııalyq boljaýmen aınalysatyn Bıýro qyzmetkerleri men ózge de memlekettik organdar ókilderinen turatyn ulttyq komandany daıarlaýǵa qoldaý kórsetýge daıyn ekenin bildirdi. Atap aıtqanda, demografııalyq taldaý men boljaýda jasandy ıntellekt pen úlken derekterdi qoldaný boıynsha oqytý júrgizý kózdelip otyr. Bul esepteýlerdiń dáldigin arttyryp, derektermen jumys isteýde ınnovatsııalyq tásilderdi engizýge múmkindik beredi.
Ulttyq statıstıka bıýrosynyń basshysy Maqsat Turlybaev BUU Halyqty qonystandyrý qorymen ózara is-qımyldy keńeıtý analıtıkalyq bazany nyǵaıtyp, uzaq merzimdi basqarýshylyq sheshimder qabyldaýdyń negizi sanalatyn demografııalyq boljamdardyń sapasyn arttyratynyn atap ótti.
Aıta keteıik, Qazaqstandaǵy statıstıkanyń 105 jyldyǵyna arnalǵan forým aıasynda Strategııalyq josparlaý jáne reformalar agenttigi men BUU halyqty qonystandyrý qory ózara túsinistik týraly memorandýmǵa qol qoıǵan bolatyn. Qujat demografııalyq derekter, taldamalyq jumys jáne derekterge negizdelgen saıasat qalyptastyrý salalaryndaǵy yntymaqtastyqty kózdeıdi.
Buǵan deıin Ulttyq statıstıka bıýrosy Qazaqstan halqynyń naqty sanyn ataǵan edi.