Qazaqstanda demalys jáne mereke kúnderi úshin eńbekaqyny azaıtý usynyldy
ASTANA. QazAqparat - Búgin Parlament Májilisinde jańa redaktsııalanǵan Eńbek kodeksi tanystyryldy. Densaýlyq saqtaý jáne áleýmettik damý mınıstri Tamara Dúısenova atap ótkendeı, «Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zań jobasy Qazaqstan Respýblıkasynyń zańnamasyn Eńbek kodeksiniń jobasyna sáıkestendirý maqsatynda ázirlengen.
«Qazaqstan Respýblıkasy Eńbek kodeksiniń jobasy bes ınstıtýtsıonaldyq reformany iske asyrý jónindegi 100 qadamdy, sonyń ishinde 83-qadam - eńbek qatynastaryn yryqtandyrýdy júzege asyrý aıasynda ázirlendi.
«Jańa Eńbek kodeksi arqyly eńbek qatynastaryna memlekettik aralasý shegin naqty aıqyndap alý usynylady. Qyzmetkerlerdiń eńbegine aqy tóleý máselelerin jumys berýshiniń jáne qyzmetkerdiń ózara jáne ujymdyq is-áreketteri qaǵıdattarynda reglamentteý qarastyrylǵan. Sonymen qatar, qazirgi kodekske saı, jumys saǵatynan artyq jumys istegen adamǵa 1,5 ese kóleminde artyq aqsha tólenedi. Mereke jáne demalys kúnderinde jumysqa shyqqany úshin eki ese artyq jáne túngi bir saǵat jumysyna 1,5 ese kólemnen az emes jalaqy tólenedi. Al jańa kodeks boıynsha bundaı jaǵdaılarda 1,25 eseden kem emes kólemde tólem jasaý usynylǵan. Jumys berýshi qyzmetkerdi onyń kelisimin ala otyryp artyq jumysqa tarta alady», - dep túsindirdi T.Dúısenova.
