Qazaqstanda demalys kúnderi jaýyn-shashyn bolady
ASTANA. QazAqparat - Sınoptıkter Qazaqstandaǵy 11-13 tamyz kúnderine arnalǵan aýa raıy boljamyn jarııalady, dep habarlaıdy QazAqparat.
«Karsk teńizinen kóterilgen salqyn ylǵaldy aýa massasynyń ońtústikke qaraı jyljýynyń saldarynan Qazaqstannyń kóptegen oblysynda aldaǵy kúnderi jańbyr jaýady, keı jerlerde naızaǵaı jarqyldap, jel kúsheıedi, burshaq jaýýy yqtımal», - delingen «Qazgıdromet» RMK habarlamasynda.
Sınoptıkterdiń aıtýynsha, soltústik, ortalyq jáne shyǵys óńirlerde túnde aýa temperatýrasy nólden joǵary 5-15, kúndiz 15-23 gradýsqa deıin tómendeıdi. Batysta kún jaýyn-shashynsyz, tek kezeńniń sońynda aýa aǵynynyń ótýine baılanysty qysqa merzimdi jańbyr jaýyp, naızaǵaı oınaýy múmkin, keıin birtindep aýa temperatýrasy kóteriledi.
