Qazaqstanda demalys kúnderi kún bultty bolady
ASTANA. QazAqparat - «Qazgıdromet» RMK 29 sáýir - 2 mamyr aralyǵyna aýa raıy boljamyn jarııalady, dep habarlaıdy «QazAqparat» HAA tilshisi.
Sáýir aıynyń sońynda Qazaqstannyń kóptegen oblystarynda burynǵysha kún bultty bolyp, keı jerlerde jańbyr jaýyp, onyń arty jańbyr aralas qarǵa ulasýy múmkin. Aýa temperatýrasy qalypty normadan 2-5ºS-qa tómen bolýy yqtımal. Mundaı aýa raıy respýblıka aýmaǵynan sýyq arktıkalyq aýa massalarynyń ótýimen baılanysty. Onyń artynan Skandınavııanyń soltústiginde qalyptasqan antıtsıklon taralady. Tek batys oblystarda aýa raıy jaýyn-shashynsyz, aýa temperatýrasy joǵary bolady, dep atap ótti sınoptıkter.
Mamyr aıynyń basynda Qazaqstan aýmaǵyna keletin antıtsıklonnyń arqasynda jaýyn-shashyn toqtap, aýa temperatýrasy birinshi batysta, keıin basqa óńirlerde joǵarylaıtyn bolady.
