Qazaqstanda demalys kúnderi aýa raıy qandaı bolady
ASTANA. QazAqparat - Sınoptıkter 30 tamyzdan 3 qyrkúıekke deıingi aýa raıy boljamyn jarııalady, dep habarlaıdy QazAqparat.
«Jaz aıaqtalyp keledi, muny qazaqstandyqtar tamyzdyń sońǵy kúnderi sezinip otyr. Batys Sibirdiń soltústik bóliginen jyljyǵan salqyn aýa aǵyndary demalys kúnderi Qazaqstan aýmaǵynan ótedi, soǵan baılanysty salqyn ári aýqymdy antıtsıklon ornyǵady. Sondyqtan 30-31 tamyz kúnderi respýblıkanyń kóptegen oblysynda jańbyr, shyǵysta jáne ońtústik-shyǵystyń taýly aýdandarynda nóser jaýýy múmkin», - delingen «Qazgıdromet» RMK habarlamasynda.
Antıtsıklon taralýyna baılanysty jańbyr saıabyrsyp, aýa temperatýrasy tómendeıdi. Respýblıkanyń soltústik, ortalyq jáne shyǵys oblystarynda temperatýra kúndiz 15-23°S-tan 8-15°S-qa deıin, túnde plıýs 2-7°S-qa deıin, ońtústik-shyǵysta kúndiz 18-25°S-qa deıin tómendeıdi. Tek batys jáne ońtústik oblystarda burynǵysha ystyq aýa saqtalyp, kún jaýyn-shashynsyz, aýa temperatýrasy kúndiz 27-34 gradýs aralyǵynda bolady.
