Qazaqstanda demalý mádenıeti tómen – maman pikiri

ASTANA. KAZINFORM – 18 jasta qaza bolǵan jas jigittiń ólimine qatysty kúdiktiler qylmysy dáleldengen jaǵdaıda 15 jylǵa deıin bas bostandyǵynan aıyrylýy múmkin. Bul týraly zańger Arjan Sádýaqas Jibek Joly telearnasynyń Búgin Live baǵdarlamasynda aıtty.

Mamannyń sózinshe, eger kúdiktiler pyshaqty ózin-ózi qorǵaý maqsatynda qoldanyp, qorǵanys sheginen aspaǵany anyqtalsa, jaza 4–5 jylǵa deıin shektelýi múmkin. Al qorǵanys sheginen shyǵyp, qasaqana adam óltirgeni dáleldense, 15 jylǵa deıin bas bostandyǵynan aıyrý jazasy qarastyrylady.

– Bul jerde ekinshi taraptyń tóbeleskeni nemese tóbelespegeni mańyzdy emes. Qylmystyq jaýapkershilik báribir týyndaıdy. Kimniń bastaǵany emes, oqıǵanyń nemen aıaqtalǵany mańyzdy, – dedi ol.

Sonymen qatar Arjan Sádýaqas túngi saǵat 23:00-den keıin alkogol satylatyn oryndarda kásibı kúzetshiniń bolýy mindetti ekenin atap ótti.

Onyń aıtýynsha, kásibı kúzetshi degen tek dene bitimi iri adam emes, janjaldy sheshýge qabiletti maman bolýy tıis.

– Eger túngi oıyn-saýyq ortalyǵy jumys istese, onda mindetti túrde kásibı kúzetshi bolýy kerek, – dedi zańger.

Maman Qazaqstanda demalý mádenıetiniń tómen ekenin de aıtty.

Onyń pikirinshe, túngi oıyn-saýyq oryndarynda álsiz adamdarǵa, sonyń ishinde áıelderge nemese fızıkalyq shamasy tómen er adamdarǵa tıisý jaǵdaılary jıi kezdesedi.

– Munyń barlyǵy tárbıege kelip tireledi. Jas býynmen jumys istep, zań aıasynda tárbıeleý qajet. Tárbıe bar jerde qylmys ta az bolady, – dep túıindedi Arjan Sádýaqas.

Eske salsaq, Astanada túngi klýbta jastar arasynda janjal týyndap, 18 jastaǵy jigit mert bolǵan edi.