Qazaqstanda demalys kúnderi aýa raıy qubylmaly bolady
ASTANA. KAZINFORM — «Qazgıdromet» RMQ 30 mamyr men 1 maýsym aralyǵyna arnalǵan aýa raıy boljamyn jarııalady.
— Eldiń soltústiginde, ońtústiginde jáne batysynda atmosferalyq frontaldy bólikterdiń ótýine baılanysty aýa raıy qubylmaly bolady — jańbyr jaýyp, naızaǵaı kútiledi, — delingen habarlamada.
Sınoptıkterdiń boljamynsha, 30-31 mamyr kúnderi Batys Qazaqstan, Atyraý, Mańǵystaý, Aqtóbe jáne Qostanaı oblystarynda qatty jańbyr jaýyp, burshaq túsýi jáne ekpindi jel kútiledi.
Respýblıkanyń qalǵan aýmaǵynda jaýyn-shashynsyz aýa raıy basym bolady. El boıynsha jeldiń kúsheıýi boljanady, al ońtústik óńirlerde shańdy daýyl bolýy múmkin.
Aıta keteıik, Qazgıdromet 30 mamyrda qolaısyz aýa raıyna baılanysty birqatar óńirde eskertý jasady.
