Qazaqstanda dástúrli bankterdi ıslam bankterine aınaldyrý jónindegi tetikter qurylady
ASTANA. QazAqparat - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Respýblıkasy Ulttyq bankiniń qyzmeti máselesi boıynsha ózgerister men tolyqtyrýlar engizý týraly» QR Zańynyń jobasy birinshi oqylymda maquldandy.
Zań jobasynda ekinshi deńgeıdegi bankterdegi jumys istemeıtin kredıtterdiń deńgeıin tómendetý, olardyń nesıe qorjyndarynyń sapasyn jaqsartýǵa mamandandyrylǵan strestik aktıvterdi basqarý jónindegi qyzmetti júzege asyratyn uıymdardyń ashyqtyǵyn arttyrý, eldiń qarjy júıesiniń turaqtylyǵyn arttyrý, zańnamadaǵy Ulttyq banktiń taratylǵan vedomstvolaryna silteme jasaý normalaryn alyp tastaý, tutynýshylardyń respýblıkanyń qarjy júıesine degen senimin jáne olardyń zańdy quqyqtary men múddelerin qorǵaý deńgeıin arttyrýǵa baǵyttalǵan QR-nyń birqatar zańnamalyq aktilerine ózgertýler men tolyqtyrýlar engizý kózdelip otyr.
Jalpy otyrys barysynda negizgi baıandama jasaǵan QR Ulttyq banki tóraǵasynyń orynbasary Qýat Qojahmetovtiń aıtýynsha, Zań jobasy Qazaqstan qarjygerleriniń qaýymdastyǵy jáne ulttyq kásipkerler palatasy arqyly qoǵamdyq birlestiktermen, sonymen qatar múddeli memlekettik organdarmen kelisilgen. Sondaı-aq onda QR Prezıdenti ákimshiligi men Májilis depýtattarynyń eskertýleri qaperge alynǵan.
«Zań jobasynda QR-nyń 8 kodeksine jáne 33 zańyna ózgertýler engizý kózdeledi. Zań jobasynyń negizgi baǵyttary mynalar bolyp tabylady. Birinshi, qarjylyq qyzmetterdi tutynýshylardyń quqyqtaryn qorǵaý jáne ekinshi deńgeıdegi bankterdiń tólem jasaýǵa qabiletsiz qaryzdaryn alýshylarmen jumystar tetigin jetildirý. Ekinshi, bankterdiń jumys istemeıtin aktıvterimen jumys boıynsha qosymsha tetikterdi jáne jaǵdaılardy qurý. Úshinshi, qarjy júıesiniń turaqtylyǵyn qamtamasyz etý. Tórtinshi qarjy naryǵynyń ınfraqurylymyn damytý. Besinshi, qarjy naryǵyndaǵy buzýshylyqtar úshin jaýapkershilikti arttyrý. Altynshy, memlekettik ıslamdyq baǵaly qaǵazdar shyǵarylymynyń jaǵdaılaryn jetildirý jáne dástúrli bankterdi ıslam bankterine aınaldyrý jónindegi tetikterdi qurý», - dedi Q.Qojahmetov.
