Qazaqstanda dástúrli temekige suranys azaıyp, elektrondy temeki men kalıan tanymal bolýda
ASTANA. KAZINFORM – Qazaqstanda dástúrli temekige suranys tómendep, balamaly ónimderdiń – qyzdyrylatyn temeki men kalıannyń tutynýy artyp keledi, dep habarlaıdy Tañba Biryńǵaı tańbalaý jáne qadaǵalaý operatory.
2020 jylǵy 1 qazannan bastap elde temeki ónimderin mindetti tańbalaý engizilgen. Sodan beri Qazaqstanda óndirilgen jáne ımporttalǵan tańbalanǵan temeki ónimderiniń jıyntyq kólemi 6 mlrd qorapqa jaqyndady.
2025 jyldyń qańtar–tamyz aılarynda qyzdyrylatyn temeki ónimderiniń óndirisi men ımporty ótken jyldyń sáıkes kezeńimen salystyrǵanda 69%-ǵa ósti. 2024 jyly 48,5 mln qorap óndirilse jáne ákelinse, bıyl bul kórsetkish 82 mln qorapqa jetti.
Sondaı-aq kalıanǵa arnalǵan temeki óndirisi men ımporty eki eseden astam artyp, 766 myńnan 1,7 mln qorapqa deıin kóbeıdi.
- Al klassıkalyq temekige suranys kerisinshe tómendeýde. 2021–2023 jyldary óndiris pen ımport 950 mln–1,05 mlrd qorap aralyǵynda bolsa, 2024 jyly kórsetkish 844 mln qorapqa deıin qysqarǵan, - delingen aqparatta.
Tañba operatorynyń derekterinshe, Qazaqstan naryǵyndaǵy temekiniń basym bóligi el ishinde óndiriledi. 2025 jyldyń basynan beri óndirilgen 581 mln qorap ónim tańbalanǵan.
Jalpy óndiris pen ımport kólemi – 626 mln qorap. Negizgi jetkizýshiler qatarynda Ózbekstan, Reseı jáne Germanııa bar.
Qyzdyrylatyn temeki ónimderi naryǵynda otandyq óndiristiń úlesi jartysyna jetpeıdi. Bul segmentte negizgi eksporttaýshylar – Ózbekstan, Indonezııa jáne Polsha. Al kalıanǵa arnalǵan temekide ımport basym: ónimniń 69%-y shetelden jetkiziledi, onyń ishinde eń úlken úles Reseıge tıesili.
Aıta keteıik, tsıfrlyq tańbalaý júıesi ónimniń óndirýshiden tutynýshyǵa deıingi qozǵalysyn baqylaýǵa múmkindik beredi. Qazaqstanda satylatyn barlyq temeki ónimderi Data Matrix kodymen belgilenýi tıis. Naqty Onim mobıldi qosymshasy arqyly tutynýshylar ónimniń túpnusqalyǵyn teksere alady. Eger kod oqylmasa nemese múlde bolmasa, qosymsha arqyly shaǵym qaldyrýǵa bolady.
Eske salaıyq, UQK temeki buıymdarynyń iri partııasyn zańsyz ótkizbek bolǵandardyń jolyn kesti.