Qazaqstanda daryndy balalarǵa arnalǵan bilim ordalary jelisine taǵy úsh mektep qosyldy
ALMATY. QazAqparat - Qazaqtanda daryndy balalarǵa arnalǵan bilim ordalary jelisine taǵy úsh mektep qosyldy. Bul týraly búgin Almatyda QR BǴM «Daryn» Respýblıkalyq ǵylymı-praktıkalyq ortalyǵy Oqý-ádistemelik keńesiniń keńeıtilgen otyrysynda jarııa etildi.
«Osy ótken qańtar aıynyń sońynda QR Bilim jáne ǵylym mınıstriniń buıryǵyna sáıkes, úsh mektep Mamandandyrylǵan bilim berý uıymdarynyń jelisine engizildi. Bular elimizge belgili mektepter: Almaty mańyndaǵy «Arystan» mamandandyrylǵan lıtseıi, Astana qalasy ákimdiginiń №82 «Daryn» mamandandyrylǵan lıtseıi jáne Atyraý oblysy bilim basqarmasynyń «Atyraý oblysynyń daryndy balalarǵa arnalǵan Jylyoı lıtseı-ınternaty». Sońǵysy - aýyl mektebi, al bul biz úshin óte qýanarlyq jaǵdaı. Aldaǵy naýryz aıynda osy mektepke barýdy josparlap otyrmyz. Bizdiń jeli jylma-jyl bolmasa da aldaǵy bes jyl ishinde taǵy da basqa mekteptermen tolyǵady degen senimdemiz. Óıtkeni, bizdiń qol jetkizgen jetistikterimiz az emes», - dedi óz sózinde QR BǴM «Daryn» Respýblıkalyq ǵylymı-praktıkalyq ortalyǵynyń pedagogıkalyq sheberlik zerthanasynyń jetekshisi Aıgúl Qarqulova.
Al plenarlyq otyrysta kún tártibine sáıkes, pedagogıka salasyna qatysty ózekti máselelerdi talqylaý kózdelgen.
«Keńes otyrysynda 2016 jylǵa arnalǵan jumys josparyn talqylaý jáne bekitý, Shyǵys Qazaqstan oblysynyń «Daryn» aımaqtyq ǵylymı-praktıkalyq ortalyǵynyń qyzmetimen tanysý, beıindik oqytý boıynsha oqý josparlaryn jobalaý, beıindik oqytý, rýhanı-adamgershilik tárbıe berý máseleleri talqylanady», - dedi óz kezeginde ShQO Semeı qalasyndaǵy Shákárim atyndaǵy oblystyq darynda balalarǵa arnalǵan úsh tilde oqytatyn mekteptiń dırektory Alma Áýbákirova.
Sonymen qatar, búgingi keńes otyrysyna jınalǵandar Almaty qalasyndaǵy Sultan-Ahmet Qojyqov atyndaǵy №39-shy mamandandyrylǵan lıtseıdiń pedagogıkalyq is-tájirıbesimen tanysady.
Oqý-ádistemelik keńestiń keńeıtilgen otyrysyna QR bilim jáne ǵylym mınıstrliginiń sarapshylary, joǵary oqý oryndarynyń ǵalymdary, Y. Altynsarın atyndaǵy Ulttyq bilim akademııasynyń ókilderi, daryndy balalarmen jumys jónindegi aımaqtyq ǵylymı-praktıkalyq ortalyqtardyń qyzmetkerleri, mamandandyrylǵan bilim berý uıymdarynyń basshylary, ıaǵnı 42 mekteptiń dırektory men 38 mektep dırektorlarynyń oqý isi boıynsha orynbasarlary qatysýda.
Aıta ketelik, búgingi tańda respýblıkada «Daryn» Respýblıkalyq ǵylymı-praktıkalyq ortalyǵyna qarasty 9 Daryndy balalarmen jumys jónindegi aımaqtyq ǵylymı-praktıkalyq ortalyq jumys isteıdi. Sondaı-aq, mamandandyrylǵan bilim berý uıymdary jelisine engen mektepterdiń sany - 124-ke jetti.
Eki kúnge josparlanǵan oqý-ádistemelik keńestiń otyrysy odan ári jalǵasýda.
