Qazaqstanda Daryn HUB ǵylymı-zertteý ortalyǵy ashylady

NUR-SULTAN. QazAqparat – Elimizde daryndy balalarmen jumys isteýge arnalǵan jańa ǵylymı-zertteý ortalyǵy ashylady. Bul týraly «Daryn» respýblıkalyq ǵylymı-praktıkalyq ortalyǵynyń dırektory Ánýar Unaıbekov málim etti, dep habarlaıdy QazAqparat tilshisi.

«Taǵy bir yqtımal joba «Daryn HUB» ǵylymı-zertteý ortalyǵynyń ashylýy. Atalǵan ortalyqty ashý bizge iri halyqaralyq olımpıadalarǵa qurama komandalardy neǵurlym joǵary deńgeıde daıyndaýǵa múmkindik beredi. Sondaı-aq, ortalyqta daryndy balalardyń qatysýymen ǵylymı-praktıkalyq jumystar júrgiziledi. Odan bólek, biz mamandandyrylǵan bilim berý uıymdarymen jumys sheńberinde akkredıtatsııa júıesin iske qosýdy josparlap otyrmyz», - dedi Ánýar Unaıbekov QR Oqý-aǵartý mınıstrliginde ótken apparat jınalysynda.

Sonymen qatar mekeme basshysy «Daryn» ortalyǵynyń 25 jyldyǵyna oraı Qazaqstan olımpıadashylarynyń sleti ótetini týraly tilge tıek etti.

«Marketıngtik jumys aıasynda halyqaralyq olımpıada júldegerleriniń sýretterin elordanyń ortalyq saıabaǵyndaǵy Atyraý kópirine ornalastyrýǵa ruqsat aldyq. Jaqyn arada daryndy balalarymyzdyń sýretteri ilinedi. Sol sııaqty sońǵy 30 jyl ishinde respýblıkalyq jáne halyqaralyq olımpıada júldegerler sanynyń qanshalyqty óskenin eseptedik», - deıdi ol.