Qazaqstanda Dármen Sádýaqasov kýbogyna arnalǵan shahmat týrnıri ótedi
NUR-SULTAN. QazAqparat - 28-30 tamyz aralyǵynda «Báıterek» UBH» AQ, Dármen Sádýaqasov shahmat akademııasy jáne «Bolashaq» qaýymdastyǵy jedel shahmattan balalar onlaın-týrnıri – halyqaralyq grossmeıster Dármen Sádýaqasov kýbogyn uıymdastyrady. Qazaqstan Respýblıkasynyń Konstıtýtsııasy kúnine arnalǵan jarysqa 600-ge jýyq qazaqstandyq jas daryn qatysady dep kútilýde.
Іs-sharanyń basty mindeti - karantın jáne halyqaralyq shekaralar jabyq kezeńde sapaly týrnır tájirıbesin qajet etetin otandyq talanttardy qoldaý.
Jarys 2002-2005, 2006-2009 jyldary, sondaı-aq 2010 jyly týǵan jáne odan kishi jastaǵy uldar men qyzdar arasynda ótedi. Júlde qory - 2,6 mln teńge. Sonymen qatar, uldar men qyzdarǵa jeke syılyq taǵaıyndaldy.
Týrnır lichess.org oıyn alańynda ótedi. Oıyn Shveıtsarııa júıesi boıynsha 9 týrdan turady. Ýaqytty baqylaý – partııanyń sońyna deıin ár qatysýshynyń júrisine 15 mınýt + 10 sekýnd.
Jarysqa qatysý úshin ótinimder dscup2020@gmail.com elektrondy poshtasyna qabyldanady, tirkeý merzimi - Nur-Sultan ýaqytymen 24 tamyz 18:00-ge deıin. Ótinishte jeke basyn kýálandyratyn qujattyń kóshirmesin jáne uıaly telefon nómirin qosa kórsetý qajet.
Búginde týrnırge 200-den astam oıynshy tirkelgen.
Týrnırdiń bas tóreshisi - halyqaralyq tóreshi, FIDE sheberi Erjan Shákenov.
Antıchıterlik komıssııany halyqaralyq grossmeıster Ánýar Ismaǵambetov basqarady. Komıssııanyń mindeti - ádil oıyndy qamtamasyz etý jáne syrtqy keńester men kompıýterlik baǵdarlamalardy qoldanýǵa baılanysty túrli buzýshylyqtarǵa jol bermeý. Alaıaqtyqpen kúres - qazirgi shahmattyń basty máselesi.
Tirkeý, tóreshilik, júldelerdi bólý, tóreshiler men antıchıterlik komıssııanyń jumysy týraly tolyq aqparatty jarys erejesinen bilýge bolady.
