Qazaqstanda dárilik zattardy tańbalaý tetigi jańartylady

ASTANA. KAZINFORM — Densaýlyq saqtaý mınıstrligi dárilik zattardy jáne medıtsınalyq buıymdardy tańbalaý men olardy qadaǵalaý júıesiniń qaǵıdalaryna ózgerister ázirledi. 

Atalǵan qujat Ashyq NQA portalynda 23 jeltoqsanǵa deıin qoǵamdyq talqylaýǵa jarııalandy.

Atalǵan ózgerister «Taýarlardy tańbalaý jáne qadaǵalaý» aqparattyq júıesiniń fýnktsıonalyn keńeıtýdi kózdeıdi. 

Mınıstrlik jańa túzetýler engizý arqyly elimizde dárilik zattardyń qozǵalysyn tolyq baqylaýǵa múmkindik beretin aýmaqtyq-uıymdastyrý bólimshelerin qurýdy josparlap otyr. Bul jańalyq logıstıkalyq tizbektiń árbir núktesinde preparattardyń aınalymyn qadaǵalaýdy jeńildetedi.

Sonymen qatar eki jáne odan da kóp shtrıhkodtan turatyn tasymaldaý qaptamasyn qalyptastyrý múmkindigi engizilmek. Bul ádis skanerleý kezinde tehnıkalyq qıyndyqtardy azaıtady jáne farmatsevtıka naryǵy qatysýshylary úshin yńǵaılyraq bolady.

Densaýlyq saqtaý mınıstrligi jańartylǵan tańbalaý jáne qadaǵalaý tetikteri halyqty sapasyz ári jasandy dárilerden qorǵaýǵa, memlekettik baqylaýdyń tıimdiligin arttyrýǵa jáne naryq ashyqtyǵyn kúsheıtýge baǵyttalǵanyn atap ótti.

— Jańartylǵan mehanızmder halyqtyń qaýipsizdigin qamtamasyz etip, dárilik zattardyń zańdy aınalymyna baqylaýdy kúsheıtedi, — delingen vedomstvo habarlamasynda.

Buǵan deıin DDU usynǵan ómirlik mańyzdy dárilerdiń tiziminde búgingi tańda otandyq preparattardyń úlesi 37%-ǵa jetetinin jazǵanbyz.