Qazaqstanda dárilerdiń baǵasyn ustap turý týraly qujat bekitildi

ASTANA. QazAqparat - Búgin Astanada QR Densaýlyq saqtaý jáne áleýmettik damý mınıstri Tamara Dúısenova men Qazaqstannyń kásibı farmatsevtıkalyq qaýymdastyqtarynyń basshylary 200 ataý boıynsha dárilik zattar men medıtsınalyq buıymdardyń baǵasyn ustap turý týraly memorandýmǵa qol qoıdy.

«Bul qujatqa qol qoıý arqyly adamdarǵa úlken qoldaý jasalýda. Osy oraıda qaýymdastyqtar ózderine júktep otyrǵan áleýmettik jaýapkershilik úshin alǵysymdy bildirgim keledi»,- dedi qol rásiminde vedomstvo basshysy T.Dúısenova. Atalǵan memorandým halyqtyń áleýmettik qaýqarsyz toptaryn qoldaýǵa negizdelgen. Atap aıtqanda, dárilik jáne medıtsınalyq zattardyń otandyq jáne halyqaralyq óndirýshileri, dıstrıbıýtorlar men bólshek saýdanyń ókilderi 2015 jylǵy 1 naýryzdaǵy deńgeıde baǵalardy bekitip, jıi paıdalanylatyn dáriler men medıtsınalyq maqsattaǵy buıymdardyń 200 ataýyna baǵany ustap turý jónindegi jaýapkershilikti ózderine aldy. Bul turǵyda qabynýǵa qarsy, aýyrsynýdy jáne dene qyzýyn basatyn preparattar, antıbıotıkterdiń keıbir túrleri, shprıtster men medıtsınalyq dákeler qamtylyp otyr. «Qazaqstannyń FarmMedIndýstrııasy» qaýymdastyǵynyń prezıdenti Serik Sultanovtyń sózine qaraǵanda, endi 200 dári-dármekke baǵa kótirlmeıtin bolady. Osy oraıda atalǵan dárilerdiń tizbesi árbir dárihanada ilinip turady. Al memorandýmǵa oraı dáriler baǵasyn bekitilgen baǵadan asyrǵandardy jaýapkershilikke tartý máselesine toqtalǵan ol: «Bul turǵyda aıyppul az emes. Mınıstrliktiń árbir qalada farmatsevtıkalyq ınspektsııasy bar. Sondyqtan tıisti qadaǵalaý nazardan tys qalmaıdy», - dedi.

Belgili bolǵandaı, qujatta boıynsha qamtylǵan dárilerdiń 70-i - sheteldik preparattar.