Qazaqstanda dárigerlerge arnalǵan kásibı áleýmettik jeli ashyldy
ASTANA. QazAqparat - Qazaqstanda dárigerlerge arnalǵan áleýmettik jeli paıda boldy. Ol mamandarǵa eldiń túkpir-túkpirindegi áriptesterinen keńes alyp, belgili bir taqyryptardy talqylaýǵa qatysýǵa, aqparatpen almasyp, maqala, ǵylymı materıaldaryn jarııalaýyna múmkindik beredi. Bul týraly Respýblıkalyq densaýlyq saqtaýdy damytý ortalyǵynyń baspasóz qyzmeti habarlap otyr.
Aıta keteıik, otandyq dárigerlerge arnalǵan «edariger.kz.» áleýmettik jelisi sheteldik «vrachı RF», «medrublika.ru», «evrika.ru», «israeldoktor.com», «medcitynews.com» syndy portaldaryna uqsas. Kásibı áleýmettik jeliniń jumysy jaqynda QR DSM Respýblıkalyq densaýlyq saqtaýdy damytý ortalyǵyna berildi.
Internet-resýrs dárigerlerdiń kásibı biliktilik sanatyn alý kezindegi maqalalar jarııalaýyna múmkindik beredi dep josparlanyp otyr. Sebebi mamandardyń jazǵan maqalalary saıtta tegin jarııalanyp, qoǵam nazaryna usynylmaq.
Uıymdastyrýshylardyń aıtýynsha, áleýmettik jeliniń tek dárigerler úshin ǵana emes, halyq úshin de paıdasy zor. Olaı deıtini, kez kelgen adamdar medıtsınalyq uıym, dárihana men elimizde tirkelgen dári-dármekter jaıyndaǵy aqparatty atalmysh saıttan taba alady.
