Qazaqstanda dárigerler tapshylyǵy bar ma
ASTANA. QazAqparat - QR Densaýlyq saqtaý mınıstrligi medıtsınalyq qyzmetkerlermen qamtamasyz etilý jaǵdaıyn túsindirdi, dep habarlaıdy QazAqparat.
Belgili bolǵandaı, qazirgi ýaqytta densaýlyq saqtaý júıesi shamamen 74,6 myń dáriger men 170,8 myń orta medıtsınalyq qyzmetkerlerdi (barlyq vedomstvolardy qosa alǵanda), sonyń ishinde aýyldyq jerlerde 11,8 myń dáriger jáne 45,6 myń OMQ-ny qamtamasyz etedi.
«Sońǵy 5 jylda medıtsınalyq qyzmetkerler úshin qajettilik 32 paıyzǵa tómendegenine qaramastan, densaýlyq saqtaý salasy áli kúnge deıin medıtsınalyq qyzmetkerlerdiń jetispeýshiliginen zardap shegýde. Tapshylyq 3116-ny (01.01.2017 jylǵy resmı statıstıka málimetterine sáıkes) qurady, onyń jartysy kadrlardyń jyldyq tabıǵı ketýi (dárigerler jalpy sanynyń 2,6%) esebinen qalyptasty. Bos shtattyq qyzmetkerler boıynsha aýyldaǵy tapshylyq 616, al qalada 2500-di qurady», - delingen QR DSM Qoǵamdyq densaýlyq saqtaý komıtetiniń «QazAqparatqa» bergen málimetinde.
Qyzmetkerlerdiń jetispeýshiligi kóbinese Mańǵystaý oblysynda (358), Qostanaı oblysynda (308), Astana qalasynda (278), Soltústik Qazaqstan oblysynda (274), Qyzylorda oblysynda (204) baıqaldy.
Atap aıtqanda, búginde bul kemshilikterge qolda bar kadrlardy tıimsiz paıdalaný, meıirbıkeniń rólin baǵalamaý, sondaı-aq kadrlardyń basqa da joǵary aqyly salalarǵa ketýge alyp keletin tómen yntalandyrý áser etýde. Resýrstardy tıimsiz paıdalaný aýrýhana deńgeıinde medıtsınalyq kadrlardyń artyq bolýyna jáne alǵashqy medıtsınalyq kómek kórsetý deńgeılerinde jetispeýshilikke ákeledi.
«Bul saladaǵy problemalar personaldy esepke alýdyń biryńǵaı júıesiniń bolmaýyna, shtattyq normatıvterdiń eskirgeni ári jetkiliksizdigine baılanysty oryn alýda», - delingen vedomstvo aqparatynda.
