Qazaqstanda «Dárigerler mártebesi týraly» zań qabyldana ma – Asqar Mamın jaýap berdi
Úkimet basshysy keltirgen málimet boıynsha, densaýlyq saqtaý júıesinde 254 myńǵa jýyq medıtsınalyq qyzmetker jumys isteıdi. Onyń ishinde 74 myń dáriger bolsa, 180 myńy orta medıtsınalyq qyzmetkerler.
«2020 jyldan bastap medıtsına qyzmetkerleriniń jalaqysyn kezeń-kezeńimen arttyrý kózdelip otyr. Medıtsınalyq qyzmet kórsetýge arnalǵan tarıfter aqysyz medıtsınalyq kómektiń kepildendirilgen kólemi jáne mindetti áleýmettik medıtsınalyq saqtandyrý júıesi aıasynda artty. Bul dárigerlerdiń jalaqysyn orta eseppen 30%-ǵa jáne orta medıtsınalyq qyzmetkerlerdiń jalaqysyn 20%-ǵa kóterýge múmkindik berdi. Memleket basshysynyń tapsyrmasymen medıtsına qyzmetkerleriniń jalaqysy jyl saıyn ósip, ortasha jalaqy deńgeıi 2023 jylǵa deıin 2 ese artady. Pandemııa kezinde Úkimet koronavırýs ınfektsııasyna, epıdemııaǵa qarsy is-sharalarǵa aralasqan densaýlyq saqtaý júıesiniń qyzmetkerlerine ústemeaqy tóledi», - deıdi jaýabynda Asqar Mamın.
Premer-Mınıstr medıtsına qyzmetkerleriniń qaýipsiz eńbek sharttaryn qamtamasyz etý maqsatynda qajetti sharalardyń bári qabyldanǵanyn habarlaıdy. Medıtsına uıymdarynyń bárinde jeke qorǵanys quraldarynyń qory jınaqtalǵan. Infektsııalyq statsıonarlar men alǵashqy medıtsınalyq-sanıtarlyq kómek kórsetý uıymdarynda sanıtarlyq-epıdemıologııalyq talaptar qamtamasyz etilýde. Aımaqtardyń qajettiligine baılanysty jas mamandardy bólý júıesi engizilgen.
«Qazaqstan Respýblıkasy azamattarynyń densaýlyǵy jáne densaýlyq saqtaý júıesi týraly» kodeksinde medıtsına qyzmetkerleriniń mártebesin arttyrý, áleýmettik qamsyzdyǵyn retke keltirý, patsıenttiń ómiri men densaýlyǵyna zııan keltirgen jaǵdaıda kásibı jaýapkershiligin saqtandyrý boıynsha normalar qarastyrylǵan. Jańa normalarǵa sáıkes, medıtsına qyzmetkerleri qyzmettik mindetterin oryndaý kezinde issapar shyǵyndaryn, ómiri men densaýlyǵyna keltirilgen zııandy óteýge, jergilikti bıýdjetten áleýmettik qoldaý sharalaryn, qosymsha jeńildikter men yntalandyrý tólemderin alýǵa quqyly. Kodeks sonymen qatar memlekettik organdar men laýazymdy adamdardyń medıtsına qyzmetkerleriniń kásiptik qyzmetine aralasýyn shekteýdi, medıtsınalyq qyzmetkerlerdi ózderiniń kásibı mindetterimen baılanysty emes jumys túrlerine tartýǵa tyıym salýdy qarastyrady», - deıdi Asqar Mamın.
Premer-Mınıstr sonymen qatar, aýyldy eldi mekenderde jáne aýyldarda, aýdandyq mańyzy bar qalalarda jumys isteıtin memlekettik medıtsınalyq uıymdardyń medıtsınalyq qyzmetkerlerine jergilikti atqarýshy organdardyń sheshimi boıynsha turǵyn úıdi mindetti túrde berý, járdemaqylardy mindetti túrde tóleý, kommýnaldyq shyǵyndardyń ornyn toltyrý úshin áleýmettik qoldaý kórsetý sharalary qarastyrylǵanyn málim etti.
«Memleket basshysynyń tapsyrmasyn oryndaý maqsatynda medıtsına qyzmetkerlerin quqyqtyq jáne qarjylyq qorǵaý júıesin engizý máseleleri pysyqtalýda. Osylaısha, qazirgi ýaqytta medıtsına qyzmetkerleriniń materıaldyq qamtamasyz etý men kásibı qorǵaýdyń negizgi máseleleri kodekste qarastyrylǵan. Osyǵan baılanysty «Medıtsına qyzmetkeriniń mártebesi týraly» jeke zań ázirleýdiń qajettigi joq dep sanaımyn», - dep túıdi Asqar Mamın.
