Qazaqstanda dáriger men patsıentti qashyqtan baılanystyratyn medıtsınalyq joba iske qosylady

«Bul dáriger men patsıentti qashyqtan baılanystyratyn medıtsınalyq joba. Bul rette dárigerler aqyly keńes beredi. Qazaqstannyń  búkil aýmaǵynan dárigerler tartyp, Reseı, Ýkraına jáne Izraıldiń úzdik mamandaryn jumyldyramyz. Baǵany dáriger belgileıdi. Eger jaqsy pikirlerdiń arqasynda onyń reıtıngi kóteriletin bolsa, onda qyzmet aqysyn da kótere alady. Biraq, naryqtan qaraǵanda eki ese tómen bolady. Óıtkeni, mundaı mamandar artyq shyǵyn jumsamaıdy. Dárigerge telefon, garnıtýra jáne kamera bolsa jetkilikti.  Ol úıinde otyryp nemese demalysta júrip jumys isteı alady», - dedi ol «Astana Hub» halyqaralyq ІT-startaptar tehnoparkiniń ashylý rásiminen keıin BAQ ókilderine bergen suhbatynda.

Onyń esebinshe, dáriger kúnine 2 saǵattan jumys isteıtin bolsa, aıyna 30 myń teńgege deıin qarajat taba alady. Bul rette keńes berý quny shamamen 2-3 myń teńge bolmaq. Al aqyly emhanalarda dáriger mundaı qyzmet túrine shamamen 5 myń teńge alady.

«Qazir shamamen 150 dáriger bar. Olardyń ishinen iriktep alyp, oqytamyz jáne derekqoryna tirkeımiz. Árıne, onlaın keńes berý júzbe-júz  qaralýdy almastyra almaıdy. Degenmen, QR Densaýlyq saqtaý mınıstrliginiń statıstıkasyna sáıkes, 2017 jyly klınıkalarǵa patsıentter 20 mıllıon ret júgingen eken. Sonyń shamamen 15 paıyzy qashyqtan-aq keńes ala alar edi. Al telemedıtsına AQSh-ta osydan 3 jyl buryn damyǵan. Reseıde jarty jyl boldy. Al Qazaqstanda, Ortalyq Azııa elderinde biz eń birinshi bolyp qolǵa aldyq», - dedi joba jetekshisi.

Onń aıtýynsha, Zoomcare baǵdarlamasy tolyqtaı daıyn, ony daıyndaýǵa 500 myń dollar jumsalǵan. Degenmen, ony júzege asyrý úshin áli de 500 myń dollar qarajat qajet. Bul qarajat Ortalyq Azııada marketıng júrgizýge jáne taǵy 20 ázirleýshini jumyspen qamtýǵa qajet.