Qazaqstanda dári-dármektiń 76 paıyzy dárigerdiń taǵaıyndaýymen beriledi

ASTANA. QazAqparat - 2016 jylǵy 1 qańtardaǵy málimetterge sáıkes, Qazaqstanda 7713 dárilik zattardyń ataýy tirkelgen, onyń ishinde dárigerdiń taǵaıyndaýymen beriletin dáriler sany 5871 (QR-da tirkelgen dárilik zattardyń jalpy sanynyń 76%-y), retseptisiz beriletin dárilik preparattar sany - 1842. Bul týraly QR Densaýlyq saqtaý jáne áleýmettik damý mınıstrliginen habarlandy.

Retseptimen beriletin dárilik zattar tizimine mıkrobqa qarsy jáne gormondy preparattar; quramynda esirtki quraldary men psıhotropty zattary bar dárilik preparattar; júrek-qantamyrlary aýrýlaryn emdeıtin dárilik zattar; ishek-qaryn joldary aýrýlaryn emdeýde qoldanylatyn dárilik zattar kiredi.

Dárigerdiń taǵaıyndaýynsyz beriletin dárilik zattar: dárýmender, murynǵa tamshylatatyn dáriler, shyryndar, shópten jasalǵan shaılar men jınaqtar, keıbir qabynýǵa qarsy jáne aýrýdy basatyn preparattar. 

QR DSÁDM Medıtsınalyq jáne farmatsevtıkalyq qyzmetti baqylaý aımaqtyq departamenti mamandarynyń 2015 jylǵy Astana turǵyndaryna júrgizgen saýalnamasyna qaraǵanda,  dárilik zattardy alý barysynda adamdardyń 51%-y farmatsevter jáne provızorlarmen keńesetinin, 18% - týystary jáne tanystarymen, 12% - sheshimdi ózdiginen qabyldaıtynyn jáne tek 19%-y ǵana dárigerlermen aqyldasatynyn kórsetti.

Dári-dármekterdi, olardyń kólemin, engizý tásili men emdeý uzaqtyǵyn ózdiginen tańdaý kezindegi qatelesý múmkindigi 80 paıyzǵa deıin jetedi.

Antıbıotıkter - sansyz adam ómiriniń qutqarýshysy, medıtsınanyń eń úzdik jetistikteriniń biri bolyp tabylady. Ony tıimsiz qoldaný allergııalyq reaktsııa, tynys demikpesine, júrek, búırek, baýyrdyń qaýipti aýrýlaryna, sondaı-aq, balalardyń týabitti kemistiginiń ulǵaıýyna ákeledi.

Dúnıejúzilik densaýlyq saqtaý uıymy antıbıotıkterdi durys taǵaıyndaý men qoldanýdy talap etýde. DDSU usynymdaryn eskere otyryp, QR DSÁDM medıtsınalyq jáne farmatsevtıkalyq qyzmetkerlermen dárilik zattardy taǵaıyndaý men ótkizýdiń qoldanystaǵy talaptaryn oryndaý jóninde  turǵyndarǵa ózin-ózi emdeýden týyndaıtyn qaterler týraly aqparattyq-túsindirý jumystaryn jandandyrdy.