Qazaqstanda dári-dármekterge qoıylar talaptar kúsheıtiledi
ALMATY. Qazannyń 21-i. QazAqparat /Erbol Turymbetov/ - Generıkter men bıosımılıarlardy kóp qoldaný emdelýshiler úshin qaýipti jaǵdaılar týdyrýy múmkin. Bul týraly búgin Almatydaǵy baspasóz máslıhatynda QR Ulttyq Medıtsına akademııasynyń akademıgi, «Dárilerdi saraptaý ulttyq ortalyǵy» RMK Farmakologııalyq ortalyq dırektory Raısa Kúzdenbaeva aıtty.
«Generıkter men bıosımılıarlar báribir de túpnusqasyndaı bola almaıdy. Olardy jasaýda ketken qandaı da bir qatelik qaýipti hımııalyq zatqa aparady. Sondyqtan, dári-dármek preparattaryn taǵaıyndaıtyn retteý organdary men densaýlyq saqtaý mamandary olardy árdaıym qadaǵalap, tirkeýden ótkizýleri kerek», deıdi ol.
Onyń sózine qaraǵanda, generıkter - hımııalyq preparattardyń, al bıosımılıarlar - bıologııalyq preparattardyń kóshirmeleri bolyp tabylady. Generık jasaý ońaı bolǵanmen, bıosımılıar jasalýy úlken qıyndyq týdyratyn preparat. Sebebi, ony óndirýde óte kúrdeli bıotehnologııalyq ádistemeler qoldanylady. Bul preparattar adam aǵzasyndaǵy ınsýlınderge kómekshi qyzmet atqarady.
«Elimizde generıkter halyqaralyq standdarttarǵa saı tekserýden ótkizilýi tıis. Al bıosımılıarlardy tirkeý barysynda túpkilikti tekserýlerden ótkizilýi kerek. Sebebi, ol preparattar adam densaýlyǵyna qatty áser etedi. Alaıda, ázirge Qazaqstan álemdik dıabetıkada halqynyń basym bóliginde ınsýlınderdiń molshylyǵymen maqtana alady», dedi óz kezeginde Qazaqstan Dıabetıka qaýymdastyǵynyń prezıdenti Natalıa Týkalevskaıa.
Bıologııalyq preparattar ýaqyt óte kele mańyzdylyǵyn arttyrýda. Onyń naryqtaǵy qoldanysynyń ósýi aqshalaı eseptegende 2007 jylǵa deıin 15 paıyzdy qurasa, 2014 jyly Qazaqstanǵa basqa da bıopreparattardyń ımporttyq aǵymy ulǵaıady dep kútilýde.
