Qazaqstanda dári-dármekterdiń ulttyq formýlıary jasalady
ASTANA. QazAqparat - Qazaqstanda dári-dármek baǵalarynyń ulttyq formýlıary jasalady. Bul týraly búgin Ortalyq kommýnıkatsııalar qyzmetinde ótken brıfıngte QR Densaýlyq saqtaý vıtse-mınıstri Erik Baıjúnisov málim etti.
"Jekemenshik bólshek saýdamen aınalysatyn dárihanalardaǵy baǵany turaqty deńgeıde ustap turý óte qıyn. Bizge ol jerdegi baǵalardy da qadaǵalap otyrý kerek. Bul - halyqaralyq normalardyń eń basty talaby. Sondyqtan biz Kodekske tıisti ózgertýler engizý jumystaryn jalǵastyrýdamyz. Meniń oıymsha, sáýirde bul ózgerister qabyldanady. Eń bastysy - Qazaqstanda dári-dármekterdiń ulttyq formýlıary jasalady", - dep atap ótti ol.
Vıtse-mınıstrdiń aıtýynsha, onda naqty dáriniń ataýy men belgilengen baǵasy bolady. Qazaqstannyń qaı aımaǵynda bolmasyn, eshbir dárihana ol baǵadan asyra almaıdy. Eger qunyn asyrsa, lıtsenzııadan aıyrylmaq.
"Qazirgi ýaqytta Qazaqstanda 7 myńnan astam dári-dármek ataýy jáne 11 myńnan astam farmatsevtıka nysany bar. Olardyń barlyǵyn josparly tekseristermen qamtý múmkin emes. Dárigerdiń retseptinsiz dári berý máselesi ońtaıly sheshý máselesi aldymyzda tur. Sebebi dárihanalar mamandar retseptisiniń negizinde beriletin dármekterdi eshbir qaǵazsyz erkin satyp jatyr. Bolashaqta Qazaqstan PICS halyqaralyq mamandar uıymyna enedi. Osynyń negizinde elimizde farmınspektorlar qyzmeti paıda bolady. Olar dárihanalardaǵy dárilerdiń sapasyn qadaǵalap otyrmaq", - dedi ol.
