Qazaqstanda dári-dármekterdiń shekti baǵasy 2018 jyldan bastap bekitiledi

ASTANA. QazAqparat - QR Densaýlyq saqtaý mınıstrligi dári-dármekterdiń bólshek saýdadaǵy shekti baǵasyn 2018 jyldyń 1 qańtarynan bastap bekitetin bolady, dep habarlaıdy QazAqparat. Bul týraly búgin Úkimet otyrysynda QR Densaýlyq saqtaý mınıstri Eljan Birtanov málim etti.

«Bólshek saýdadaǵy dári-dármekterdiń baǵasyn retteý týraly» zań jobasynyń tujyrymdamasy jasaqtaldy. Erteńnen bastap biz ony talqylaýǵa kóshemiz. Aldymen qoǵamdyq keńeste, keıin Ulttyq kásipkerler palatasynda, BAQ-ta keńinen taldaıtyn bolamyz. Qoǵam talqylaýynan soń, zań jobasy bıyl kúzde Parlamentke joldanady. Jyl sońyna deıin ony qabyldap, 2018 jyldyń 1 qańtarynan bastap dári-dármekterdiń shekti baǵasyn bekitemiz degen úmit bar», - dep atap ótti mınıstr.

Bunyń aldynda, QR Densaýlyq saqtaý mınıstrliginiń Farmatsııa komıteti QazAqparattyń resmı saýalyna oraı QR Parlamenti Májilisiniń depýtaty Záýresh Amanjolovanyń dárihanalardaǵy dári baǵasynyń qymbattyǵyna qatysty synyna jaýap bergen bolatyn . 

Onda QR Densaýlyq saqtaý mınıstrligi  búkil dárilerdiń baǵasyn retteý úshin  farmatsevtıka qoǵamdastyǵynyń ókilderimen birge barlyq dárilik zattardyń shekti baǵasyn qalyptastyrý ádistemesin talqylaý jumysyn júrgizip jatqandyǵy týraly habarlanǵan edi.