Qazaqstanda dári-dármekterdiń árbir azamatqa qoljetimdi bolýyn qamtamasyz etetin Ulttyq dárilik formýlıar jasalýda
ASTANA. QazAqparat - 2015 jyldyń sońyna deıin QR Densaýlyq saqtaý jáne áleýmettik damý mınıstrliginiń mamandary áleýmettik jaǵdaıy men tabysynyń mólsherine qaramastan árbir azamatqa dárilik kómekti qoljetimdi etýdi qamtamasyz etetin, dárilerdiń shekteýli baǵasy belgilengen Ulttyq dárilik formýlıardy ázirleıdi. Ulttyq dárilik formýlıarǵa klınıkalyq tıimdiligi dáleldengen dáriler ǵana engiziledi.
Bul týraly QR DSÁDM baspasóz qyzmeti habarlady.
Formýlıardy jasaý kezinde farmakoterapııany júrgizý barysynda aldyńǵy qatarly tájirıbe men dálelderge negizdelgen halyqaralyq tásilder qoldanylmaq. Joǵaryda aıtylǵan qujatty daıyndaý úshin álemde úzdik dep tanylǵan Brıtan ulttyq dárilik formýlıaryn jasaýshy Dýnkan Enraıt shaqyryldy. Odan basqa Ulttyq formýlıardy ázirleýge Eýropanyń, Avstralııanyń eń úzdik sarapshylary, sondaı-aq otandyq mamandar qatysýda.
Ulttyq dárilik formýlıar Qazaqstanda birinshi ret ázirlenip jatqanyn atap ótý kerek.
Ony ázirleý kezinde klınıkalyq jáne ekonomıkalyq tıimdi, qaýipsiz dárilik preparattardy tutyný deńgeıin, ár aýrýdy emdeý kýrsynyń baǵasyn zertteý boıynsha málimetter qoldanylady.
Ulttyq dárilik formýlıardyń jasalýy básekelestik ortany keńeıtýge yqpal etedi. Sondaı-aq, dárilerdiń qajettiligin esepteýge jáne patsıentke baǵdarlanǵan dári-dármekti satyp alýǵa múmkindik beredi.
Dýnkan Enraıttyń pikirinshe, Ulttyq dárilik formýlıar azamattarǵa dárilik zattardyń qoljetimdiligin qamtamasyz etýge jáne olardy tıimdi satyp alý esebinen bıýdjettik qarajatty únemdeýge múmkindik beretin biregeı qujat bolmaq.
«Bizdiń halyqaralyq sarapshylar komandasy basqa da jobalar, sońymen qatar osy tárizdi eń alǵashqy resýrs - Brıtandyq Ulttyq formýlıar boıynsha jumys jasaǵan bolatyn. Qazaqstannyń Ulttyq dárilik formýlıary bilimniń jańa resýrsyn qamtamasyz etýdi, formýlıarlyq júıeni nyǵaıtýdy, sondaı-aq medıtsınalyq dálelderdi paıdalanýǵa járdemdesýdi maqsat tutatyn tuńǵysh jańa formýlıar», - deıdi Dýnkan Enraıt.
Odan basqa, tegin medıtsınalyq kómektiń kepildik berilgen kólemi sheńberinde dárilik zattarǵa shekteýli baǵa qalyptastyrý jóninde halyqaralyq tájirıbe negizinde jańa erejeler ázirlengen bolatyn.
