Qazaqstanda dári-dármek arzandaıdy

ASTANA. QazAqparat - Búginde xalyqqa tegin taratylatyn dáriler «eń arzan baǵa» qaǵıdasy boıynsha satyp alynady. Aldaǵy ýaqytta atalǵan júıeni barlyq preparattarǵa taratý josparlanǵan, dep xabarlaıdy QazAqparat tilshisi.

QR Densaýlyq saqtaý mınıstri Eljan Birtanovtyń aıtýynsha, dári-dármek jetkizýshi kompanııalar aldymen baǵany tirkep, ashyq kórsetedi. Atalǵan baǵa naqty derekterge negizdelýi shart. Ol úshin 39 eldiń baǵalary alynady. Onyń ishinde Eýropa memleketteri de bar.

«Sebebi keıbir jetkizýshi kompanııalar Eýropaǵa arzan baǵamen tasıdy. Al Eýrazııalyq ekonomıkalyq odaq elderine qymbatqa satady. Osyǵan baılanysty biz 39 eldiń qataryna Eýropany da qostyq. Sóıtip, bıýdjet tarapynan satyp alynatyn dárilerdiń baǵasy eń tómengi bes baǵanyń ishinen tańdalady», - dedi E.Birtanov Astanada ótken baspasóz máslıxatynda.

Onyń sózine qaraǵanda, ázirshe atalǵan júıe tek memlekettik satyp alýlarǵa ǵana taralady. Aldaǵy ýaqytta ony barlyq preparattarǵa taratý josparlanyp otyr.

«Qazir barlyq dári-dármekterdiń baǵasyn tirkeýge arnalǵan zań jobasy Parlamentte jatyr. Atalǵan qujat birinshi oqylymnan ótti. Jyldyń aıaǵyna deıin qabyldanady degen senim bar. Sóıtip, kelesi jyldan bastap barlyq medıtsınalyq preparattardyń baǵasy tirkeýge alynady. Ónim óndirýshiler óz baǵasyn saıttar arqyly ashyq kórsetedi. Biraq basqa memleketterdiń baǵalaryn da salystyrmaly túrde kórsetýge mindetti bolady. Sonda ádil baǵa bolady», - dep atap kórsetti E.Birtanov.

Aıta keteıik, baspasóz máslıxatynda mınıstr bosanǵan áıelderdiń ólimine sebep bolatyn negizgi máselelerdi atady.

Onyń aıtýynsha, jyldyń aıaǵyna deıin tegin dári-dármek máselesi tolyǵymen sheshiledi.

Al emxanaǵa tirkelý HQKO-lar arqyly júrgiziledi.