Qazaqstanda dárigerlerdi óńirlerdiń suranysyna saı daıarlaıdy
ASTANA. KAZINFORM — Densaýlyq saqtaý mınıstrligi medıtsına mamandaryna qajettilikti eseptep, soǵan saı joǵary oqý oryndaryna qansha stýdent qabyldanatynyn aıqyndaıtyn jańa qaǵıdalardyń jobasyn ázirledi.
Jańa qujatqa sáıkes, medıtsınalyq joǵary oqý oryndaryna bólinetin oryndar óńirlerdiń naqty qajettiligine qaraı josparlanady. Osylaısha, qaı óńirge qansha dáriger men basqa da medıtsına mamany qajet ekeni aldyn ala eseptelip, soǵan saı mamandar daıarlanady.
— Bul tásil densaýlyq saqtaý júıesine qansha maman qajet bolatynyn dál boljaýǵa, suranys joǵary baǵyttardy aıqyndaýǵa jáne kadr tapshy óńirlerdi qajetti mamandarmen qamtamasyz etýge múmkindik beredi, — delingen mınıstrlik habarlamasynda.
Qujattyń negizgi maqsaty — medıtsına mamandaryn daıarlaýdy biryńǵaı júıe arqyly josparlaý. Sonyń nátıjesinde joǵary oqý oryndary men medıtsınalyq kolledjderde daıyndalatyn túlekter sany densaýlyq saqtaý salasynyń naqty suranysyna sáıkes bolady.
— Kadrmen qamtamasyz etý medıtsınalyq kómektiń sapasyna tikeleı áser etetin negizgi faktorlardyń biri ekenin atap ótti. Sondyqtan jańa qaǵıdalar aldaǵy jyldary elge qansha dáriger men orta býyn medıtsına qyzmetkeri qajet bolatynyn dálirek boljaýǵa, sondaı-aq ár óńirdiń ereksheligin eskerýge múmkindik beredi, — delingen mınıstrlik habarlamasynda.
Qajettilikti esepteý kezinde halyq sany, syrqattanýshylyq deńgeıi, medıtsına qyzmetkerlerimen qamtylý kórsetkishi, aýrýhanalar men emhanalar jelisiniń damýy jáne densaýlyq saqtaý júıesiniń damý boljamy eskeriledi.
Aıta keteıik, buǵan deıin Qazaqstanda dáriger-ınternniń mártebesi zańmen bekitilgen edi.
