Qazaqstanda dárigerlerdi daıarlaýdyń praktıkaǵa baǵdarlanǵan júıesi engizilip jatyr
ASTANA. KAZINFORM – Qazaqstanda medıtsınalyq bilim berýdiń praktıkaǵa baǵdarlanǵan jańa modeli engizilip jatyr. Negizgi basymdyq – klınıkalyq daıarlyqty kúsheıtý jáne túlektiń óz betinshe jumys isteýge daıyndyǵyn arttyrý.
Bul týraly QR Densaýlyq saqtaý mınıstrliginiń alqa otyrysynda QR Densaýlyq saqtaý birinshi vıtse-mınıstri Tımýr Sultanǵazıev málimdedi.
Jańa model Memleket basshysy 2026 jylǵy 12 maýsymda qol qoıǵan Zańda kózdelgen. Internatýranyń kólemi 30-dan 70 akademııalyq kredıtke deıin ulǵaıtylyp, klınıkalyq daıarlyqtyń tolyqqandy kezeńine aınalady. Dárigerlerdiń klınıkalyq daıarlaý traektorııasynan mindetti magıstrlik komponent alynyp tastalady, al qosymsha oqý ýaqyty beıindik daıarlyq pen praktıkaǵa baǵyttalady.
Alǵash ret ıntern-dárigerdiń mártebesi zańnamalyq turǵydan bekitildi. Klınıkalyq bazada tálimger, jumys orny, medıtsınalyq aqparattyq júıelerge qoljetimdilik jáne tájirıbeli dárigerdiń baqylaýymen medıtsınalyq kómek kórsetýge qatysý múmkindigi qamtamasyz etilýge tıis.
Jalpy praktıka dárigerlerin daıarlaý tásilderi de qaıta qaraldy. Tikeleı medıtsınalyq-sanıtarııalyq alǵashqy kómek kórsetý uıymdaryndaǵy oqytý kólemi ulǵaıtylyp, ambýlatorııalyq pedıatrııa men praktıkalyq daǵdylardy meńgerýge basymdyq beriledi.
2026 jyly rezıdentýraǵa qabyldaý alǵash ret biryńǵaı tsıfrlyq platforma arqyly júrgizilip jatyr. Granttardy bólý GPA kórsetkishi men qorytyndy memlekettik attestattaý nátıjeleriniń negizinde avtomatty túrde júzege asyrylady. Bul adamı faktordy boldyrmaýǵa múmkindik beredi. Talapker tórt mamandyqqa, tórt bilim berý uıymyna jáne bolashaqta jumys istegisi keletin tórt óńirge deıin tańdaı alady.
Jyl saıyn respýblıkalyq bıýdjetten rezıdentýraǵa shamamen 2 500 grant bólinedi. Sonymen qatar bıyl óńirler tarapynan 937 grant kózdelgen. Bul 2025 jylǵy 721 grantpen salystyrǵanda aıtarlyqtaı kóp.
Sondaı-aq rezıdentter daıarlyǵynyń bir bóligin keıin jumys isteıtin óńirlerde tikeleı ótkizý úshin bilim berý-klınıkalyq konsortsıýmdardy damytý josparlanyp otyr.
2026 jyly densaýlyq saqtaý baǵdarlamalary boıynsha 16 192 maman oqýyn aıaqtady. Olardyń 7 610-y mindetti eńbek óteýge jatady. Aldyn ala bólinis boıynsha 5 951 túlek, ıaǵnı 78,1%-y jumys oryndaryna bólindi.
-Jas dárigerdi óńirge jiberý ǵana mańyzdy emes, onyń sol jerde ornyǵýyna jaǵdaı jasaý qajet. Bul – turǵyn úı, áleýmettik qoldaý, jumys orny, tálimgerlik jáne kásibı damý múmkindikteri, – dep atap ótti QR Densaýlyq saqtaý birinshi vıtse-mınıstri Tımýr Sultanǵazıev.
Reformanyń kelesi kezeńi – joǵary oqý oryndarynda, klınıkalyq bazalarda jáne óńirlerde jańa talaptardy is júzinde iske asyrý.
Osyǵan deıin densaýlyq saqtaý resýrstaryn basqarýdyń biryńǵaı tsıfrlyq platformasy iske qosyldy.
