Qazaqstanda dárigerler tapshylyǵy 19%-ǵa qysqardy - mınıstrlik
ASTANA. KAZINFORM – Qazaqstanda medıtsınalyq kadrlardy daıarlaý men qoldaýǵa baǵyttalǵan sharalardyń nátıjesinde dárigerler tapshylyǵy 19%-ǵa azaıdy, dep habarlaıdy QR Densaýlyq saqtaý mınıstrligi.
2025 jyly medıtsınalyq joǵary oqý oryndaryn 11 626 túlek támamdady. Olardyń ishinde 1333 jas dáriger aýyldyq medıtsınalyq uıymdarǵa jiberildi. Bul ótken jylǵy kórsetkishpen salystyrǵanda tórt ese kóp (2024 jyly – 370 dáriger).
Vedomstvonyń dereginshe, kadr tapshylyǵyn azaıtýǵa birqatar áleýmettik qoldaý sharalary yqpal etti. 2024 jyldyń qazan aıynan bastap asa tapshy 13 mamandyq boıynsha aýyldyq jerde jumys isteıtin 254 dárigerge 8,5 mln teńge mólsherinde birjolǵy tólem berildi. Nátıjesinde dárigerler tapshylyǵy 19%-ǵa, orta medıtsına qyzmetkerleriniń tapshylyǵy 7%-ǵa, aýyldardaǵy tapshylyq 16%-ǵa tómendedi.
- Memleket basshysynyń tapsyrmasymen rezıdentýraǵa qosymsha 1000 grant bólindi. Sondaı-aq medıtsınalyq bilim berýdiń sapasyn arttyrý baǵytynda jańa tásilder engizilýde. 1 qyrkúıekten bastap ınternatýrada jalpy praktıka dárigeri, terapııa, pedıatrııa, hırýrgııa, balalar hırýrgııasy, akýsherlik jáne gınekologııa mamandyqtary boıynsha daıarlyq bastalady. Balalar beıini boıynsha tapshylyqty azaıtý úshin rezıdentýrada 14 baǵyt boıynsha oqytý uıymdastyryldy, - delingen aqparatta.
Dıplomǵa deıingi deńgeıde dárigerlik kadrlardy daıarlaý baǵdarlamalary qaıta qaralyp, bazalyq pánderge qosymsha 10 kredıt engizildi. Medıtsınalyq bilim berýdiń barlyq deńgeıinde stıpendııalar 20%-ǵa kóterildi.
Halyqaralyq ıntegratsııa baǵytynda da naqty qadamdar jasaldy. 1 qyrkúıekten bastap Qaraǵandy medıtsına ýnıversıteti men Qazan federaldyq ýnıversıtetiniń memorandýmy aıasynda qos dıplomdy baǵdarlama boıynsha bakalavrlardy qabyldaý bastalady. Sonymen qatar Pákistanda Qazaqstan medıtsına ýnıversıtetiniń fılıaly ashylady. Bul jobalar qazaqstandyq medıtsınalyq bilimniń halyqaralyq bedelin arttyrýǵa múmkindik beredi.
Aıta keteıik, almatylyq dárigerler aýyr júrek aýrýy bar naýqasqa kúrdeli ota jasady.