Qazaqstanda dáriger tapshylyǵy azaıyp keledi - Densaýlyq saqtaý mınıstrligi

ASTANA. KAZINFORM – Qazaqstanda medıtsına kadrlarynyń tapshylyǵy birtindep tómendep keledi. Bul týraly Densaýlyq saqtaý mınıstrligi habarlady.

Derekte 2023 jylmen salystyrǵanda dárigerler tapshylyǵy 20 paıyzǵa, al orta medıtsınalyq personal tapshylyǵy 7 paıyzǵa qysqarǵany atap ótilgen.

Mınıstrlik málimetinshe, qazirgi tańda Qazaqstanda dárigerlermen jáne orta medıtsına qyzmetkerlerimen qamtamasyz etý kórsetkishi Ekonomıkalyq yntymaqtastyq jáne damý uıymy (EYDU) elderiniń ortasha deńgeıinen asyp túsedi.

- 2025 jyly medıtsınalyq joǵary oqý oryndaryn 11 626 túlek bitiredi dep kútilýde. Olardyń úshten ekisi óńirlerge bólinip, jergilikti medıtsınalyq uıymdarǵa jumysqa ornalasady, – dep kórsetilgen habarlamada.

Kadr jetispeýshiligin azaıtý úshin memleket tarapynan qoldaý sharalary qabyldanyp jatyr. Máselen, suranysqa ıe mamandyqtar boıynsha aýyldyq jerge bes jyldan astam merzimge jumys isteýge jiberilgen 254 dáriger jalpy somasy 2,1 mlrd teńgeden asatyn kóterme járdemaqy (100 ETJ mólsherinde) alǵan.

Sondaı-aq, medıtsınalyq joǵary oqý oryndary stýdentteriniń stıpendııasy orta eseppen 20 paıyzǵa ulǵaıtylǵany aıtylǵan.

- Óńirlik suranysty eskere otyryp, bakalavrıat pen rezıdentýraǵa 5 myńnan astam bilim berý granty bólindi. Sonymen qatar, rezıdentýra sheńberinde «Pedıatrııa» baǵyty men balalarǵa arnalǵan 14 jańa mamandyq engizilgen. Bul sharalar bilikti medıtsınalyq kadrlardyń tapshylyǵyn joıýǵa múmkindik beredi – delingen mınıstrlik aqparatynda.

Aıta keteıik, Aqtóbeniń bas sanıtarııa dárigeri sottaldy.